04 октября 2014 г.
Аслă Çĕрпỹел ялĕнче вырнаçнă райпо лавккине юсаса çĕнетнĕ хыççăн октябрĕн 2-мĕшĕнче савăнăçлă лару-тăрура уçрĕç. Çак ятпа ял халăхĕ лавкка умне пуçтарăннă.
Çĕнĕ лавкка уçăлнă ятпа йĕркеленĕ уява район пуçлăхĕ, Комсомольски райпо совечĕн председателĕ Е.И. Карпеев уçрĕ. Ун хыççăн ял çыннисен умĕнче Аслă Çĕрпỹел ял тăрăхĕн пуçлăхĕ Г.Г. Ракчеев, "Мастер" тулли мар яваплă организаци директорĕ К.А. Ахметов сăмах каларĕç. Хăйăва каснă хыççăн магазин заведующийĕ З.В. Макарова пурне те çĕнĕ лавккана кĕме йыхравларĕ. Кунта сутуçăсем валли те, туянакансем валли те мĕн пур услови туса панă. Çутă тата газ кĕртсе панисĕр пуçне шыв патне те урама тухмалла мар, кранран вĕри шыв та юхать. Лавккана апат-çимĕç продукчĕсемпе çеç мар, куллен ыйтакан таварсемпе те тивĕçтернĕ. Çавăн пекех тавар туянакан хăйне мĕн кирлине хăй суйласа илме пултарать.
- Çак ĕçе пурнăçлама пулăшнăшăн К.А. Ахметова тав сăмахĕ калас килет. Унăн пулăшăвне кура кăçалхи çул эпир районти 3 лавккана юсаса тирпей кĕртме пултартăмăр. Ман шутпа, пурнăç вăл велосипедпа пынă пекех: ярăннă вăхăтра чарăнтăн пулсан - ỹкетĕн, хыçалалла таптараймастăн. Çавăнпа эпир те йывăрлăха парăнмастпăр, малаллах талпăнма тăрăшатпăр. Хальхи вăхăтра Тукай ялĕнче тепĕр лавккара юсав ĕçĕсем пыраççĕ. Унта та, кунти пекех, шыв кĕртсе, туалет туса тивĕçтересшĕн. Ĕç кунпа çеç вĕçленмест, çитес вăхăтра ытти ялсенчи суту-илỹ точкисене те юсама пуçласшăн, - пĕлтерчĕ район пуçлăхĕ. Ял халăхĕ Евгений Карпеева, райпо коллективне тата строительсене магазина юсаса çĕнетнĕшĕн, чаплă парнешĕн чун-чĕререн тав турĕ.
Источник: "Каçал Ен"