27 августа 2014 г.
"Çăпатапа кантри, çỹпçипе хупăлчи", - пĕр-пĕринпе çураçуллă, килĕштерсе пурăнакан мăшăрсем пирки çапла калаççĕ халăхра. Пĕр-пĕрне ĕмĕр тăршшĕпех юратса, хисеплесе, шăкăл-шăкăл пурăнакан çемьесем пирĕн тăрăхра сахал мар.
Вĕсенчен пĕрисем - Хирти Шăхасан ялĕнче пурăнакан Автономовсем: Клавдия Николаевнăпа Петр Леонтьевич. Вĕсем çемье çавăрнăранпа кăçал шăп та лăп 55 çул. Чăваш Республикин Пуçлăхĕн Михаил Игнатьевăн Указĕпе çемье институтне çирĕплетес тĕлĕшпе тунă пысăк çитĕнỹсемшĕн çур ĕмĕр ытла пĕр-пĕринпе алла-аллăн утакан мăшăра "Юратупа шанчăклăхшăн" орденпа наградăланă.
Килĕшỹллĕ çемьере виçĕ ывăлпа икĕ хĕр çитĕннĕ. Ватăсем 9 мăнукпа тата вĕсен 3 ачипе савăнаççĕ. Автономовсене ял-йыш хисеплет, сума сăвать. Вĕсем çамрăксемшĕн тĕслĕх вырăнĕнче. Петр Леонтьевич 45 çул ытла "Красный Октябрь" колхозра водительте тăрăшнă. Ĕçри çитĕнỹсемшĕн вăл Хисеп грамотисемпе медальсем илме тивĕç пулнă. Клавдия Николаевна 35 çул Кĕçĕн Çĕрпỹел вăтам шкулĕнче вĕрентекенре тăрăшнă. Вăл - ЧАССР тава тивĕçлĕ учителĕ. Хĕрарăм обществăлла ĕçре те хастар пулнă. Ăна Аслă Çĕрпỹел ял Совечĕн депутатне те пĕрре кăна мар суйланă. Клавдия Николаевна Хирти Шăхасан ялĕнчи хĕрарăмсен советне те ертсе пынă. Автономовсем паянхи кун та ĕçсĕр лармаççĕ: картиш тулли выльăх-чĕрлĕх тытаççĕ, тĕрлĕ пахча çимĕç çитĕнтереççĕ, илемлĕ чечексем ỹстереççĕ. Пур ĕçе те пĕрле пурнăçлаççĕ вĕсем. Çавăнпах пулĕ çемьере яланах килĕшỹ хуçаланать.
Источник: "Каçал Ен"