05 февраля 2014 г.
Комсомольски районĕн 75 çулхи юбилейне халалланă смотр-конкурса малалла тăсса кăçал пĕрремĕш концерт паракансем Аслă Çĕрпÿелсем пулчĕç. Вĕсен пултарулăхне курма пынисем культурăпа кану центрĕн фойинче «Акă манăн тăван ялăм, акă манăн тăван кил» сăн ÿкерчĕксен куравĕпе кăмăлпах паллашрĕç.
Г.Г. Ракчеев пуçлăх пирваях Аслă Çĕрпÿел ял тăрăхĕн паянхи ĕçĕ-хĕлĕ, пурнăçĕ çинчен тĕплĕн каласа пачĕ. «Иртнисĕр малашлăх çук», теççĕ. Çакна шута илсе Геннадий Герольдович хăйĕн докладĕнче çак тăрăхра çуралса ÿснĕ паллă çынсем пирки те чарăнса тăчĕ, çак территорири ялсене, хуçалăхсене аталантарассишĕн нумай вăй хунисене ятранах асăнчĕ.
Çав каç сцена çине учительсемпе ачасем те, ял хуçалăхĕнче тăрăшакансем те, ытти сферăсенче вăй хуракансем те тухрĕç. Аслă Çĕрпÿелсем концерт программине тĕрлĕ жанрлă хайлавсене кĕртнĕ. Юрă-ташă, кулăшла сценка пĕр-пĕринпе ылмашăнса кăна тăчĕç. Куракансене уйрăмах ачасен ушкăнĕн ташшисем, учительсем шăрантарнă юрăсем килĕшрĕç. Маргарита Григорьева та пысăк таланчĕпе палăрчĕ. Вăл Ленинград блокади çинчен хывнă юрра гитарăпа хăй выляса чуна пырса тивмелле, куççуль кăлармалла юрларĕ. Ял поселенийĕнчи «Илем» фольклор ушкăнĕ чăваш халăх юррисене янраттарнипе, тăпăр-тăпăр ташшипе тыткăнларĕ.
Смотр-конкурса малалла Элпуçсем тăсаççĕ. Сочире çав кун Олимпиада пуçланнипе концерт маларах пĕлтернĕ пек февралĕн 7-мĕшĕнче мар, 6-мĕшĕнче пулать, 18.30 сехетре пуçланать. Çитсе курма васкăр!
Л.ШУРЯШКИНА
Источник: "Каçал Ен"