12 октября 2013 г.
Иртнĕ кунсенче Йăвашкел ялĕнче пурăнакан хисеплĕ çын Петр Тихонович Ядров 75 çул тултарчĕ. Вăл Кĕçĕн Çĕрпÿел шкулĕнчен вĕренсе тухсан 2 çул колхозра весовщикре ĕçленĕ. Унтан шофера вĕреннĕ. Салтак çулĕсене Германире 3 çул ирттернĕ. Хĕсмет хыççăн Канашра трактористсен курсне пĕтернĕ. Унтанпа мĕн тивĕçлĕ канăва тухиччен, 45 çул, тăван «Красный Октябрь» колхозра трактористра ĕçленĕ. Петр Тихонович хăй ĕçĕнче пултаруллă механизатор, пур ĕçе те вăхăтра та тĕплĕ тунипе палăрса тăнă, çамрăксемшĕн наставник пулнă. Çамрăклах обществăлла ĕçе кÿлĕннĕскер, паянхи кун та вăл ку ĕçрен пăрăнмасть. 17 çул ял Совечĕн депутачĕ пулнă, 34 çул халăх заседателĕнче тăрăшнă. Вунă çул ытла ĕнтĕ Петр Тихонович Кĕçĕн Çĕрпÿел, Йăвашкел, Тутар Йăвашкел ялĕсенчи вăрçă тата ĕç ветеранĕсен вырăнти совечĕн председателĕн ĕçĕсене туса пырать. Вырăнти ял тăрăхĕн администрацине тăтăшах тĕрлĕ сĕнÿ-канашсемпе кĕрсе тухать.
Петр Тихоновичăн йывăр та пархатарлă ĕçне пысăка хурса хакланă. Ăна 1970 çулта «Ĕçри паттăрлăхшăн. В.И.Ленин çу-ралнăранпа 100 çул çитнĕ ятпа» юбилей медалĕпе, 1973—1974 çулсенче «Социализмла ĕç ăмăртăвĕн çĕнтерÿçи», 1985 çулта «Вун пĕрмĕш пилĕк çуллăхăн ударникĕ» паллăсемпе чысланă. 1986 çулта «Хисеп Палли» орден илме тивĕçнĕ. 1997 çулта пултаруллă ĕçчене «Чăваш Республикин тава тивĕçлĕ механизаторĕ» ятпа чысланă.
Аслă Çĕрпÿел ял администрацийĕн пуçлăхĕ Геннадий Ракчеев Петр Тихоновича юбилей ячĕпе ăшшăн саламларĕ, пурнăç çулĕпе паянхи пекех малашне те вашаватлăн утма çирĕп сывлăх, тулли телей, канлĕ ватлăх, вăрăм ĕмĕр сунчĕ.
Источник: "Каçал Ен"