Публикации » Шкулти уяв

Юпа уйăхĕн 6-мĕшĕнче Кĕçĕн Çĕрпÿел шкулĕ шавласа та кĕрлесе тăчĕ. Кунта паян учитель-ветерансем тата халь ĕçлекен учительсем уява пуçтарăнчĕç. Кашни учитель-ветерана ачасем чечек çыххисемпе кĕтсе илчĕç. Унтан шкула кайма хатĕрленекен ушкăн тата 5—6-мĕш классем савăнăçлă концерт лартса пачĕç. Куракансем ачасене тăвăллăн алă çупса тав турĕç, тата та маттур пулма хавхалантарчĕç.

Малалла ял поселенийĕн библиотекарĕ Г.Н.Родионова сăмах илчĕ, учительсене уяв ячĕпе саламларĕ. Унтан вăл çак уява килнĕ хăнасенчен пĕри, тавра пĕлÿçĕ, Чăваш Республикин тава тивĕçлĕ учителĕ Ф.Я.Григорьев пушă алăпа килменнине пĕлтерчĕ. Истори çулталăкĕ ячĕпе Федор Яковлевич Аслă Çĕрпÿел тăрăхĕнчи шкулсем çинчен кĕнеке çырса хатĕрленĕ. Вăл вĕренÿ сферин аталанă-вĕпе йывăрлăхĕсене туллин тишкернĕ. Кĕнекене «Из страниц истории МБОУ «Старочелны-Сюрбеевская СШ» ят панă, учитель-ветерансене, халь ĕçлекен учительсене, ачасене, выпускниксене халалланă. Чăнах та, кĕнекене алла тытсан уйрăлма та çук. Кунта фотоматериал та нумай. Çак кĕнекере учительсен автобиографийĕпе те паллашма пулать.

Ф.Я.Григорьев сăмах илнĕ май, кĕнеке хатĕрлеме пулăшакансене, хăйĕн мăнукне, ял поселенийĕн библиотекарьне Г.Н.Родионовăна, унăн мăшăрне П.И.Родионова ăшшăн тав турĕ, вĕсем чăнах та нумай ĕçленине палăртса хăварчĕ.

Кĕнекене шкул директорне С.В.Антоновăна парнелесе, ăна ăруран ăрăва куçарса малалла та историне çырмалла пултăр, терĕ.

Светлана Васильевна çакăн пек парнешĕн тав сăмахĕ каларĕ. Ку кĕнекере учительсемшĕн те, шкул ачисемшĕн те питĕ пуян та усăллă материал нумай пулнине палăртрĕ. Сăмах май, Федор Яковлевич çак кĕнекене районти «Çĕр тата çынсем» музее те парнелерĕ.

Уява малалла культура ĕçченĕсем тăсрĕç. Г.Родионова, Л.Дюкина, В.Казакова (3-мĕш классем) куракансене илемлĕ юрăсем парнелерĕç.

Уяв пурне те килĕшрĕ.