Публикации » Тăрăшаççĕ, вăй хураççĕ

Ир тăракан кайăк тутă пулнă, теççĕ. Çакна тĕпе хурса «Сюрбеево» ОООн ферма ĕçченĕсем хĕвелпе пĕрлех вăранаççĕ, ирпе ирех выльăх витисене васкаççĕ. Ĕçĕ сахал тесе калаймăн, выльăх вăл ача пекех, пăхнине юратать. Апат панипе çеç мар, тасатмалли-тирпейлемелли те пайтах. Фермăра пурĕ 16 çын вăй хурать. Вăр-вар та çаврăнăçуллă ĕçченсем пур çĕре те ĕлкĕреççĕ. Çавăнпа та пулĕ фермăн картишне пырса кĕрсенех чи малтан тирпейлĕхпе йĕркелĕх куç умне тухаççĕ.

Паянхи кун «Сюрбеево» ОООра 331 пуç мăйракаллă шултра выльăх тытаççĕ. Маларах 250 пуç сысна та усранă пулсан, кăçалтан вĕсене тытма пăрахнă. Ферма заведующийĕ Геннадий Волков пĕлтернĕ тăрăх, сысна усрани тăкаклă пулса тухать. Ун вырăнне мăйракаллă шултра выльăх шутне 500-е çитерме палăртаççĕ.

Çу кунĕсем çитнĕ май выльăх-чĕрлĕхе симĕс курăк çине кăларнă ĕнтĕ. Евгений Николаев, Николай Иванов, Евгений Константинов, Владимир Акчурин, Владимир Алексеев скотниксем черетленсе кĕтÿ кĕтме тухаççĕ. Выльăхсем хирте пулнипе усă курса витесенче юсав ĕçĕсем ирттереççĕ, унтан-кунтан çĕнетсех тăраççĕ.

Хальхи вăхăтра хуçалăхра — сăвакан 90 ĕне. Кашнинчен вăтамран 16 килограмм сĕт суса илеççĕ. Ку вăл пĕлтĕрхи çак вăхăтринчен 0,7 килограмм сахалрах. Сăлтавне Геннадий Волков ĕнесен пăруламалли графикĕ куçса кайнинче курать. Чылайăшĕ кĕркуннех пăруланă май, халĕ сăвăм кăштах чакнă. Çапах симĕс курăк çине тухнă ĕнесем çывăх вăхăтрах нумайрах сĕт антарма пуçласса шанать ферма заведующийĕ. Палăртса хăвармалла: хуçалăх сĕт суса илессипе районта лайăххисен шутĕнче. Районти вăтам кăтарту 14,4 килогрампа танлашать.

Фермăра пурĕ 3 доярка вăй хурать. Венера Трофимовăна, Галина Кольцовăна, Галина Ефремовăна 30-шар ĕне уйăрса панă. Вĕсен тăрăшулăхĕнчен хуçалăхри сăвăм мĕнле пуласси чылай килет. Паянхи кун сĕтри çу шайĕ те пысăк пулнине палăртмалла. Пахалăхлă продукцие Кипеçри сĕт-çу заводне ăсатаççĕ.

Пĕтĕмлетсе çакна калас килет: тăрăшсан, кĕрĕк арки йăваласа лармасан, ÿсĕмсем пулаççех. Эппин, фермăн пуласлăхĕ пурри иккĕлентермест.