Публикации » Юлия Соколова – «Хÿхĕм пике»

Нумаях пулмасть Шупашкарти Я.Г.Ухсай ячĕллĕ культура керменĕнче Чăваш чĕлхи кунне халалланă «Чăваш пики — 2012» республика конкурсĕ кăçал 6-мĕш хут иртнĕ. Конкурсăн тĕп шухăшĕ — чăн-чăн илем, ăс-тăн, шухăш-кăмăл, творчествăлла пултарулăх, сăн-пит хитрелĕхĕ пĕр-пĕринпе килĕшсе тăнинче пулнине кăтартасси.

Конкурса Чăваш Республикин 13 районĕнчен 17—25 çулхи пикесем хутшăннă. Хĕрсем тĕрлĕ енлĕн тупăшнă. Творчество конкурсĕнче пикесем хăйсен артист ăсталăхĕпе тĕлĕнтернĕ. Çавăн пекех вĕсем чăваш наци апат-çимĕçĕсене пĕçерсе килсе вĕсен рецепчĕсемпе паллаштарнă, чăваш тумĕсене кăтартнă.

Жюри членĕсем конкурса хутшăнакансен ĕçне «Чăваш пики — 2012», «Вице-чăваш пики — 2012», «Хÿхĕм пике», «Çепĕç пике», «Ăс пике» номинацисемпе хакланă.

Пирĕн районтан конкурса Кĕçĕн Çĕрпÿел вăтам шкулĕнче 11-мĕш класра вĕренекен Юлия Соколова хутшăннă. Илемлĕ сăн-питлĕ, яштака пике тÿрех чуна тыткăнлать. Ăмăрту вăхăтĕнче вăл тĕрлĕ енлĕ пултарулăхне уçса пама, сцена çинче хăйне тытма пĕлнине кăтартма пултарчĕ. Чĕвĕл-чĕвĕл чăваш чĕлхипе тасан калаçакан пикене жюри членĕсем те асăрхарĕç. Юля «Хÿхĕм пике» номинацире çĕнтерÿçĕ пулса тăчĕ. Çак ятпа ăна Чăваш наци конгресĕн президенчĕ Г.Н.Архипов, тĕрлĕ обществăлла, творчествăлла организацисен тата массăллă информаци хатĕрĕсен представителĕсем саламларĕç.

Мероприятие хатĕрленме пулăшнăшăн районти вĕренÿ пайне, Кĕçĕн Çĕрпÿел вăтам шкулĕн вĕренекенĕсемпе вĕрентекенĕсене, районти культура центрĕн организаципе методика службин заведующине В.Н.Курицынана, çавăн пекех «Илем» ансамбльти Г.Н.Родионовăна, Р.В.Осиповăна, З.В. Любимовăна, А.А.Терентьевăна, Н.П.Белкинана, 11-мĕш класра ăс пухакан С.Герасимова тав сăмахĕ калас килет. Унсăр пуçне район администрацийĕн пуçлăхне М.Р.Афанасьева, Чăваш Республикин Патшалăх Канашĕн депутатне К.С.Мифтахутдинова мероприятие йĕркелеме укçа-тенкĕ парса пулăшнăшăн тав тăватпăр.