Публикации » Героя асра тытса

Çĕрпÿел тăрăхĕ ĕçчен, хастар, пултаруллă çынсемпе пуян пулнă, пулать те. Тĕслĕхрен, Хирти Шăхасан ялĕ хăйĕн манăçми ывăлĕпе, Социализмла Ĕç Геройĕпе Л.Н.Акчуринпа мухтанать.

Эпир, çак тăрăхра пурăнакансем, унăн ятне ĕмĕр-ĕмĕр асра тытатпăр. Çавна май кашни çулах, Мăн кун эрнинче, паттăра асăнса Хирти Шăхасан ялĕнче шашка, шахмат турнирĕ иртет. Кăçал турнирта пурĕ 3 команда вăй виçрĕ. Кашни командăра 5-шер çын: пĕр шахматист тата тăватă шашист. Вăййа йĕркелесе ертсе пыракансем Н.П.Афанасьевпа А.П. Школьников пулчĕç. Сăмах май, шкул ачисен командинче Геройăн тăванĕ, Альберт Акчурин ăмăртнă.

Хĕрÿ тупăшура В.И.Соловьев команди пĕрремĕш вырăна çĕнсе илчĕ.

Турнирти чи çамрăк шашист И.Родионов (6 çулта), чи асли П.Д.Лукиянов (85 çулта) пулчĕç.

Çĕнтерÿçĕсене, турнира хастар хутшăнакансене Хисеп грамотисемпе тата парнесемпе чысларĕç.

Турнир çÿлти шайра иртнинче Леонтий Николаевичăн тăванĕсен — И.П.Акчуринан, В.Н. Акчуринăн, Е.А.Акчуринан, С.В.Акчуринăн, Аслă Çĕрпÿел ял поселенийĕн администрацийĕн тÿписем пысăк.