Публикации » Тĕнчери театрсен кунне халалласа

Кĕçĕн Çĕрпÿелĕнчи культура çурчĕн директорĕ Лев Чернов Пĕтĕм тĕнчери театрсен кунне асра юлмалăх ирттерес пирки чылай малтан шутласа хунă. «Кашни çул пĕр евĕрлĕ ирттернипе мар, сценарие урăхлатса пăхас»,– тенĕ вăл. Лев Яковлевич нумай-нумай çул «Красный Октябрь» колхозăн комплекслă бригадине ертсе пырса, сулмаклă кăтартусемпе палăрса тăнă. Пĕрре кăна мар районти «Ылтăн пучах» пĕчĕк приза çĕнсе илме пултарнă. Ара, бригада çулсерен уй-хиртен пысăк тухăç илессипе витĕмлĕ ĕçлесе пынă. Халĕ, 20 çул ытла ĕнтĕ, Лев Чернов ялти культура çуртне ертсе, унăн ĕçне тивĕçлипе йĕркелесе пырать.

Мартăн 27-мĕшĕнче Лев Яковлевич Кĕçĕн Çĕрпÿел вăтам шкулне театр кунне васкарĕ. Кун пирки учительсемпе, класс руководителĕсемпе тахçанах калаçса татăлнă.

Уява пĕрремĕш класран пуçласа пурте хутшăнчĕç. Шкулăн актовăй залне ашшĕ-амăшĕ, вĕренекенсем лăк туллиех пуçтарăннă. Кĕçĕнрех классем сцена çинче пĕчĕкрех сценкăсем лартса пачĕç. Аслăраххисем кулăшла интермедисемпе, хăйсем шутласа тупнă сценкăсемпе тухрĕç. Теприсем юрăллă-ташăллă программа та хатĕрленĕ. Залра ларакансем кашни класс ĕçне алă çупса йышăнчĕç, хакларĕç. Фестиваль хаваслă иртрĕ. Кашни класс парнене тивĕçрĕ.