19 декабря 2007 г.
Комсомольски 1-мĕш вăтам шкулĕ 150 çул тултарчĕ. Çакна паллă тума культурăпа кану центрне йышлăн пухăнчĕç. Шкул юбилейĕ - районшăн та, унтан вĕренсе тухнисемшĕн те, халĕ пĕлỹ паракансемшĕн те, вĕренекенсемшĕн те пысăк уяв. Унта паллă çынсем, ку шкулта пĕлỹ илнĕ, Чăваш АССР çутĕç министрĕнче 14 çул ĕçленĕ Н.Г.Счетчиков, философи наукисен докторĕ В.А.Федотов, П.П.Таллеров краевед тата ытти выпускниксем те килнĕ. Савăнăçлă мероприятие Комсомольски 1-мĕш вăтам шкулĕн директорĕ А.С.Терентьев уçрĕ, доклад туса пачĕ. Юбилей ячĕпе район администрацийĕн ял хуçалăх пайĕн начальникĕ Г.М.Киргизов, вĕрентỹ пайĕн начальникĕ Н.А.Максимов саламларĕç. Чи ăста та пултаруллă педагогсене Хисеп хучĕсем парса чысларĕç. Район администрацийĕ шкула 10 комплект компьютер техники, сĕтел-пукан, вĕрентỹ пайĕ видеокамера, цифрăллă фотоаппарат, тĕрлĕ тĕслĕ пичетлекен принтер парнелерĕç. Коллектива ытти шкулсенчи ĕçтешĕсем те саламларĕç. Уяв юрă-ташăсăр иртмест, паллах. Юбилей ячĕпе районти искусство шкулĕн вĕренекенĕсем, культура ĕçченĕсем нумай юрă шăрантарчĕç.
Источник: "Каçал Ен"