22 июля 2016 г.
Пирĕн районта пултаруллă çамрăк сахал мар. Вĕсем ытти регионсенче те пысăк çитĕнỹсемпе палăраççĕ, район чысне тивĕçлĕн хỹтĕлеççĕ. "Кĕтне" физкультурăпа спорт комплексĕ уçăлнăранпа спортсменсем тата та йышланчĕç. Вĕсенчен пĕри - Кирилл Денисов.
Кирилл Комсомольски 1-мĕш вăтам шкулĕнче пĕлỹ пухать. Мĕн пĕчĕкренех спортпа туслă, "Кĕтне" физкультурăпа спорт комплексне пĕр сиктермесĕр çỹрет. Ытларах вара триатлона кăмăллать. Вăл пĕлтĕр Хусан хулинче "Негонки" велосипедистсен клубĕ йĕркеленĕ "Казанский триатлон - 2015" ăмăртăва хутшăннăччĕ. Триатлон - шывра ишсе, велосипедпа тата çуран чупса ăмăртнинчен тăракан спорт тĕсĕ. Ăмăртăвăн кашни тапхăрĕ пĕр-пĕрин хыççăн, пĕр чарăнса канмасăр иртет. Йывăрлăхсене пăхмасăрах Кирилл пĕлтĕр 2003 çулта çуралнă тантăшĕсемпе тупăшса, çак ăмăртуран ылтăн медальпе тата кубокпа таврăннă.
Акă, кăçал та, Хусанта иртнĕ триатлон вăййинче ытти спортсменсене парăнтарса, ăмăрту тапхăрĕсене 25 минут та 11 çеккунт хушшинче тухса, Кирилл çĕнтерỹçĕ пулса тăнă. Çак пысăк çитĕнỹре паллах унăн тренерĕн Вениамин Кудряшовăн тата ашшĕн, Владимир Денисовăн, тỹпи те пĕчĕкех мар. Шăпах вĕсем спортсмена ăмăртусене хатĕрлеççĕ, сĕнỹ-канашпа пулăшаççĕ, вăй-хала çирĕплетмелли пĕтĕм вăрттăнлăха уçса параççĕ
Эпир мал ĕмĕтлĕ çамрăка çĕнтерỹпе пĕтĕм чун-чĕререн саламлатпăр. Малашнехи спорт çулĕнче тата та пысăк çитĕнỹсем патне ăнтăлма телейпе ăнăçу сунатпăр.
Е.СТЕПАНОВА
Источник: "Каçал Ен"