07 июня 2016 г.
Кăçалхи май уйăхĕнче районти ЗАГС уйрăмĕнче çемьесенче 25 ача çуралнине регистрациленĕ. Вĕсенчен 15-шĕ арçын ача, 10-шĕ - хĕрача. Пĕчĕк пепкесене ытларах Александр, Адель, Кирилл, Салават, Яна, Виктория, Софья ятсем панă. Унсăр пуçне майăн 26-мĕшĕнче районта 100-мĕш ача çут тĕнчене килнĕ. Яна Комсомольскинче пурăнакан Катерина Витальевнăпа Владимир Игоревич Коноваловсен çемйинче çуралнă.
Хăйсен хутшăнăвĕсене хут çинче çирĕплетес шутлă çамрăксем 5 мăшăр пулнă. Туй - асран тухми пулăм, анчах та чи пĕлтерĕшли - пĕр-пĕрне юратма тупа туса пĕрлешекенсем çемье вучахĕн ăшшине упрама пĕлни. Шел пулин те, май уйă-хĕнче уйрăлни çинчен калакан свидетельствăна 4 мăшăр алла илнĕ.
Туйсем кĕрлени, ачасем çурални, паллах, савăнтарать. Анчах та çутçанталăк хăйĕннех тăвать. Май уйăхĕнче кăçал 31 çын çĕре кĕнĕ. Вĕсенчен 16-шĕ - арçынсем, 15-шĕ хĕрарăмсем пулнă.
Ашшĕ камне палăртакан свидетельствăна 2 çынна панă, 1 çын ятне улăштарнă.
О.ФЕДОТОВА
Источник: "Каçал Ен"