09 декабря 2015 г.
Çỹп-çап ыйтăвĕ пирки нумай çыратпăр, калаçатпăр пулин те ыйтăва татса панă теме çук-ха. Акă, Комсомольскинче пурăнакансем хушшинче çỹп-çапа илсе тухма килĕшỹ тума васкаманнисем те пайтах. Кун пирки халăхпа тĕл пулса калаçаççĕ, сỹтсе яваççĕ. Пурте ăнланасшăн мар, ăнлансан та укçа тỹлес килмест пулас.
Иртнĕ канмалли кунсенче Комсомольски ял тăрăхĕн пуçлăхĕ Юрий Митюков, унăн çумĕ Олег Абросимов, "Полигон" ООО директорĕ Федор Уфуков Завод урамĕсенче пурăнакансемпе ("Зеленый" магазин çывăхĕнче тĕпленнисемпе) тĕл пулчĕç. Çивĕч ыйту - çỹп-çапа турттарма килĕшỹ çырасси. Асăннă урамра пурăнакансем валли чи малтанах контейнерсем лартнă. Пулăшупа усă курнăшăн вăхăтра тỹлемесен те пĕр вăхăт каяшсене ятарлă вырăна турттарнă-ха. Парăм ỹснине кура "Полигон" ĕçе малалла пурнăçламан, контейнерсене илсе хунă. Çуртсенче пурăнакансен хуçалăхра пуçтарăнакан каяшсене ăçта хумалла? Вырăнне тупнă - лавкка хыçне. Унта çỹп-çап купи пуçтарăнсах пынă.
- Тавралăха сиен кỹриччен хыт каяшсене контейнерсене пăрахасчĕ. Районтан çỹп-çап турттаракан "Полигон" ООО-па килĕшỹ вăхăтра тăвасчĕ, парăма кĕрес марччĕ. Йĕркене пăхăнманнисене, килĕшỹ туманнисене малашне явап тыттарма тытăнатпăр, штрафлатпăр, мĕншĕн тесессĕн урăхла май çук, - пĕтĕмлетрĕ тĕл пулăва Юрий Митюков.
Н.АРХИПОВА
Источник: "Каçал Ен"