25 ноября 2015 г.
2014-2020 çулсем валли районта "Сывлăх сыхлавне аталантарасси" муниципаллă программа йышăннă. Унпа килĕшỹллĕн ноябрĕн 8-мĕшĕнче наркотиксене хирĕç кĕрешекен районти комисси секретарĕ Ольга Карсакова, Комсомольски тĕп больницин наркологĕ Людмила Ярышева, Елена Ильина педагог-психолог Комсомольски 2-мĕш вăтам шкулĕнче вĕренекенĕсен организмĕнче наркотик пуррипе çуккине тĕрĕсленĕ.
Шкул ачисем ирĕклĕ тест витĕр ашшĕ-амăшĕ ирĕк панă хыççăн тухнă. Тестировани пĕтĕмлетĕвĕ тăрăх асăннă шкулти ачасем наркотикпе психотроплă япаласемпе усă курманни паллă.
Тĕрĕслевсĕр пуçне Людмила Ярышева нарколог наркотиклă япаласемпе усă курнин тата кальян сиенĕ пирки профилактика калаçăвĕ ирттернĕ, ачасене интереслентерекен ыйтусем çине хуравланă. Çавăнпа пĕрлех калаçăва Ольга Карсакова хутшăннă. Вăл вĕсене республикăри, районти криминаллă лару-тăрупа, наркотиклă тата психотроплă япаласен çаврăнăшĕн сферинчи уголовлă тата административлă яваплăхпа паллаштарнă.
Источник: "Каçал Ен"