14 ноября 2015 г.
Нумай хваттерлĕ çуртсенче пурăнакансене чылай ыйту канăçсăрлантарать. Вĕсенчен чи пĕлтерĕшли - çурта юсаса тирпейлесси. Çакна шута илсе 2014 çултанпа хваттерсенче пурăнакансем ятарлă фонда укçа-тенкĕ хываççĕ. Ăна кашни хваттер хуçи тỹлеме тивĕç. Вăхăтра тỹлеменшĕн тата пени тытаççĕ. Апла пулсассăн укçа-тенкĕне йĕркене пăхăнса хывмалла. Пухăннă укçа-тенкĕпе тата патшалăх хывнипе шăпах çуртăн кивĕ конструкцийĕсене, электричествăн, газăн, сивĕ тата ăшă шывăн пăрăхĕсене, çурт-йĕре хутса ăшăтмалли, таса мар шыва çуртран юхтарса кăлармалли тата инженери çулĕсене улăштарма е юсама, çурт тăррисене тата путвалсене, çурт никĕсĕпе стенисене юсама тата ытти нумай ĕçсене пурнăçлама усă кураççĕ. Районти нумай хваттерлĕ çуртсенче пурăнакансем асăннă укçа-тенкĕне кирлĕ пек тỹлесе пыраççĕ. Анчах та тĕллевлĕ укçана ăçта хывсан аванрах-ши?
- Нумай хваттерлĕ çуртсенче пурăнакансем укçа-тенкĕне Раççей Перекет банкĕ урлă куçарсассăн аван. Мĕншĕн тесессĕн хваттерсене юсама каякан укçа-тенкĕ хывнăшăн комисси илмеççĕ. Чăваш Республикинчи пур Перекет банкĕсенче е филиалĕсенче укçа-тенкĕне йышăнаççĕ. Çавăн пекех "Сбербанк-Онлайн", "Автоплатеж ЖКХ" пулăшупа усă курса та тỹлеме май пур, - пĕлтерчĕ район администрацийĕн капиталлă строительствăпа çурт-йĕр, коммуналлă хуçалăх пайĕн начальникĕ Александр Краснов.
- Нумай хваттерлĕ çуртсене капиталлă юсав тăвасси графикпа килĕшỹллĕн пурнăçланать е улшăнусем пулма пултараççĕ-и?
- Чăваш Республикин Министрсен Кабинечĕн 2015 çулхи июлĕн 8-мĕшĕнчи постановленийĕпе килĕшỹллĕн нумай хваттерлĕ çуртсене юсассин йĕркине палăртнă. Унпа килĕшỹллĕн республикăри программăна тĕпе хурса çуртсене маларах 4 сăлтава кура çеç юсаççĕ. Чи малтанах енчен те çурт-йĕр çав тери юхăннă пулсассăн, иккĕмĕшĕ хваттер хуçисем капиталлă юсав валли пухакан укçа-тенкĕ 80 процентран иртсессĕн, виççĕмĕшĕ - ЧР Патшалăх çурт-йĕр инспекцийĕнче капиталлă юсав ирттермелли сведенисем, капиталлă юсав тата патшалăх пулăшăвĕн фончĕсенче çите-лĕклĕ укçа-тенкĕ пур пулсассăн. Кăçалхи июнь уйăхĕнче РФ Çурт-йĕр кодексне улшăнусем кĕртнине шута илсе 2015-2016 çулсенче нумай хваттерлĕ çуртсене капиталлă юсав тăвассине хваттер хуçисемпе килĕшмесĕрех палăртаççĕ.
2014 - 2043 çулсенче Чăваш Республикинче вырнаçнă нумай хваттерлĕ çуртсене капиталлă юсав тумалли республикăри программăпа килĕшỹллĕн йышăннă кĕске вăхăтлăх планпа районта 2014-2015 çулсенче юсавпа техника предприятийĕн территорийĕнче (РТП) 15-мĕш çурта юсанă. 2015-2016 çулсенче К.Антонов микрорайонĕнчи 6-мĕш çурта юсама палăртнă.
А.ЕФРЕМОВА хатĕрленĕ
Источник: "Каçал Ен"