16 мая 2015 г.
Кĕçĕн Каçалта çуралса ỹснĕ Александр Тихонович Краснов Аслă Отечественнăй вăрçă пуçлансанах хăйĕн ирĕкĕпе Хĕрлĕ Çар ретне тăрать. Вăл Мускав патĕнчи хаяр çапăçусене хутшăнать, аманать. Госпитальте выртнă хыççăн Александра сипленме тăван килне яраççĕ. Икĕ уйăхран вăл фронта таврăнать. Вăхăт нумай та иртмест, тăванĕсем вăл хыпарсăр çухалнă пирки хыпар илнĕ. Мăшăрĕ, Майрик аппа, виçĕ ачипе тăлăха тăрса юлнă. Аслă ывăлĕ Николай 14-ра çеç пулнă. Пĕтĕм ĕç ун çине тиеннĕ. Александр Тихонович таврăнасса кашни кунах кĕтнĕ, ăна е ăçта вилнине тупас тĕллевпех хăйсем те нумай шыранă. Вĕсен ячĕпе Калуга облаçĕнчи Сухунически районĕнчен çыру килнĕ. Унта Старая Брынь ялĕнчи тăванла масарти палăк çинче шăпах Александр Тихонович Краснов ячĕ пур-мĕн. Ăна çав ялта пытарнă. Çак хыпара илнĕ хыççăнах ывăлĕ-хĕрĕ, мăнукĕсем тỹрех çула пуçтарăнма тытăннă. 2012 çулхи июнь уйăхĕнче вĕсем ашшĕн, аслашшĕн вилтăприйĕ çинче пулнă.
Валя хĕрĕ çапла аса илсе каласа парать: "Тăванла масар вырнаçнă вырăнта çав тери хаяр çапăçусем пулнă. Çĕр-çĕр çын паттăрсен вилĕмĕпе пуç хунă вырăнта 16 палăк вырнаçтарнă, вилнĕ салтаксен ячĕсене çырнă. Пирĕн атте те çак çапăçура пуçне хунă".
Валя аппа ашшĕсĕр ỹснĕ вăхăта, вăрçă çулĕсене куççуль витĕр аса илет. Мĕн пĕчĕкрен ĕçе хăнăхса ỹснĕ вăл. Тырă вырма, вăрман касма çỹренĕ. 20 çул почтальонра тăрăшнă, Комсомольскинчи кашни киле хаçат-журнал салатнă. Патшалăх страховани агенчĕ те пулнă вăл. 84 çул тултарнă кинемей ачисемпе, мăнукĕсемпе тата вĕсен ачисемпе савăнать. Ашшĕн паттăрлăхĕ пирки кашнине каласа парать.
Источник: "Каçал Ен"