25 октября 2014 г.
Иртнĕ кунсенче районти тĕп библиотекăра Комсомольски 1-мĕш вăтам шкулĕн 1 "а" класĕнче вĕренекенсемпе тĕл пулу ирттертĕмĕр. Ачасемпе "Вут-çулăм юлташ е тăшман?" темăпа калаçрăмăр, пушар хăрушсăрлăхĕн тĕп правилисемпе паллаштартăмăр. Шăпах çак правилăсене пăхăнманни, вут-çулăмпа асăрханусăр пулни инкек патне илсе çитерет. Нумай чухне уйрăмах шăпăрлансен айăпĕпе пушар тухать. Вĕсем алла шăрпăк тытаççĕ те выляма пикенеççĕ. Вут-çулăм тухсан хăраса пытанса лараççĕ. Çавăнпа та ашшĕ-амăшĕн те тимлĕ пулмалла. Пĕчĕкскерсене килте пĕччен ан хăварăр, асăрхануллă пулăр.
М.В. Мокеева библиотекарь "Вут-çулăм юлташ е тăшман?" викторина ирттерчĕ. Ачасем тупмалли юмахсене шĕкĕлчерĕç, ыйтусем çине хуравларĕç. Вĕренекенсем электрон презентаципе те кăсăкланса паллашрĕç. И.Крылова библиотекарь пушар хăрушсăрлăхĕн правилисемпе тĕплĕн паллаштарчĕ. Ачасем вут-çулăмпа яланах асăрхануллă пулма сăмах пачĕç.
Источник: "Каçал Ен"