11 октября 2014 г.
"Кооператор" ООО - районти йышлă çын ĕçлекен производство предприятийĕсенчен пĕри. Производствăра вара темĕн те пулма пултарать: пушар тухасси, газ е электроэнерги пĕтесси, оборудовани çĕмĕрĕлсе ларасси те, çынсем суранланасси-вилесси те. Çакнашкал инкексем ан пулччăр тесен яланах сыхă тăмалла, хамăрăн тата çумри çынсен пурнăçне сыхламалли майсене пĕлмелле.
Шăп çак тĕллевсене шута илсе кĕçнерни кун завод территорийĕнче гражданла оборонăпа вĕрентỹ иртрĕ. Ун вăхăтĕнче предприятире ĕçлекенсене чрезвычайлă лару-тăру пуласса асăрхаттарма тата çакăн пекки килсе тухсан мĕн тумаллине вĕрентрĕç. Ку вĕрентĕве район администрацийĕн, "Чăвашпотребсоюз" тытăмне кĕрекен производство предприятийĕсен ертỹçисем те хутшăнчĕç. Аварипе çăлав службисен, вырăнти хăй тытăмлăх органĕсен представителĕсем персонал вĕсен умне лартнă тĕллевсене аван пурнăçланине, сыхлану мелĕсене пĕлнине палăртрĕç.
"Чрезвычайлă лару-тăру енĕпе мĕн пĕлни пурнăçăрта кирлĕ ан пултăрччĕ, инкек-синкек сиртен пăрăнса çỹретĕр", - терĕç комисси членĕсем предприяти ĕçченĕсене.
Источник: "Каçал Ен"