04 октября 2014 г.
"Ватта сума сăвакан хăй те ырă куракан", - тенĕ ваттисем мĕн ĕлĕкех. Ахальтен мар октябрĕн 1-мĕшне Ваттисен кунĕ тесе çирĕплетнĕ. Çак кун эпир асанне-асаттесене, кукамай-кукаçисене саламлатпăр, тав тăватпăр. Çывăх çынсене çеç мар, ĕçтешсене сума сăвасси те йăлана кĕнĕ. Акă, октябрĕн 1-мĕ-шĕнче "Пучах" ача садне асăннă учрежденире нумай çул вăй хунă ĕçченсем пухăнчĕç. Чи малтанах вĕсене уяв ячĕпе ача сачĕн заведующийĕ Светлана Токмакова саламларĕ, çирĕп сывлăх, вăрăм ĕмĕр сунчĕ. Ачасем пухăннисене тĕрлĕ юрă-ташă, сăвă парнелерĕç. Залра ларакансем кашни номер хыççăн тăвăллăн алă çупса тав турĕç. Ĕçтешсен калаçмалли, иртнине аса илмелли, сỹтсе явмалли нумай, паллах. Пĕрле пухăннине мĕн çиттĕр?
- Ваттисене хисеплесе уяв туса пани, йыхравлани чăннипех те савăнтарать, тавах, - терĕ Елизавета Николаевна Индюкова тав туса.
Источник: "Каçал Ен"