06 августа 2014 г.
Шкулсемпе ача сачĕсем çĕнĕ вĕренỹ çулне тивĕçлĕн кĕтсе илме хатĕрленеççĕ: классемпе коридорсенче юсав ĕçĕсем пыраççĕ тата унсăр пуçне умри территорине те тирпей-илем кĕртеççĕ. Акă, "Пилеш" ача садĕнче те шăпăрлансене хăтлă пултăр тесе ырми-канми тăрăшаççĕ. Кунта çав тĕллевпе тин çеç косметика юсавĕ ирттернĕ, халĕ кунта юмах тĕнчине лекнĕ евĕрех туйăнать.
- Паянхи куна кунта тăватă ушкăна ачасем çỹреççĕ, тепĕр икĕ ушкăна август уйăхĕнче пуçласа ача садне килекеннисене йышăнăпăр. 134 ачана 12 педагог вĕрентĕ, - каласа пачĕ Вероника Александровна Герасимова ертỹçĕ.
Сăмах май, "Пилеш" садикре ачасене "От рождения до школы" программăпа вĕрентеççĕ. Пĕчĕкскерсене садике çỹреме килĕшни куç кĕретех: хаваслă шăв-шав таçтанах илтĕнсе таврана илем кỹрет.
- Вăхăта усăллă та кăсăклă ирттеретпĕр: тĕрлĕ ташăсем вĕренетпĕр, пĕчĕкскерсемпе юрăсем те шăрантаратпăр... Малашлăх вăл ырă-сывă ачасенче, çавăнпа ỹт-пĕве çирĕплетме, ăс-тăна аталантарма пулăшакан вăйăсем выляттаратпăр, - терĕ Ольга Анатольевна Смирнова аслă воспитатель. "Пилеш" садик çулсерен "Малышиада", "Спартакиада" ятлă конкурссемпе палăрать. Çакăн евĕр ăмăртусем йышпа хаваслă та савăнăçлă иртеççĕ. Часах, акă, "Кĕрхи сăнсем" выставкăра ачасемпе ашшĕ-амăшĕ хăйсен пултарулăхĕпе паллаштарĕç.
Республика тата Раççей шайĕнчи тĕрлĕрен конкурссене хутшăнни те паха пулăм. Дипломсемпе Хисеп грамотисем, куçса çỹрекен Кубока тивĕçни те асăннă садикре пысăк квалификациллĕ ĕçченсем тăрăшнине çирĕплетет. Асăннă садикре пушар хăрушсăрлăхĕн тĕп правилисене çирĕп пăхăнаççĕ, çавна май ятарлă сигнализаци лартнă. Унсăр пуçне территорие пăхса тăма çăмăлрах пултăр тесе видеокамерăсем вырнаçтарнă.
Источник: "Каçал Ен"