05 июля 2014 г.
Комсомольски районĕнчи фермер хуçалăхĕн ертỹçи Григорий Васильевич Атласкин РФ Пенси фончĕ Пĕтĕм Раççейре ирттернĕ "Чи лайăх страхлакан-2013" конкурсра çĕнтернĕ.
Çĕнтерỹçĕсене палăртнă чух çак критерисене шута илнĕ: пенси тата медицина страховкисене вăхăтра туллин тỹленине, çĕнĕ электронлă технологи урлă отчетсем панине, çавăн пекех хуçалăхри ĕçченсене пенси уйрăмĕнче вăхăтра регистрациленине.
Фермер хуçалăхĕн ертỹçи Григорий Васильевич конкурсра çынсене ĕç паракан уйрăм предпринимательсем хушшинче мала тухнă.
Июнĕн 18-мĕшĕнче Шупашкарта наградăсене савăнăçлă лару-тăрура регионсем хушшинчи "Регионсем - вĕçсĕр хутшăну" выставкăра пачĕç. ЧР сывлăха сыхлас тата социаллă аталану министрĕпе Алла Самойловăпа РФ Пенси фончĕн ЧР уйрăмĕн ертỹçи Роза Кондратьева Г. В. Атласкина çĕнтерỹпе ăшшăн саламларĕç, Раççей Пенси фончĕн председателĕ алă пуснă дипломпа чысларĕç.
Конкурс Раççейре кăçалхипе 4-мĕш хут иртет. Çак 4 çул хушшинче пирĕн районти тỹлевçĕсем яланах малти вырăнсене çĕнсе илме пултарнă, кашниех диплома тивĕçнĕ. Акă, 2010 çулта "Слава картофелю" агрофирма, 2011 çулта В.С. Агамирян уйрăм предприниматель, 2012 çулта "Урожай" колхоз çĕнтерỹçĕсем пулнă. Конкурс ĕç паракансене вăхăтра, туллин страховка тỹлесси бизнесра социаллă яваплăх иккенне çĕнĕрен аса илтерет, мĕншĕн тесен тỹленнĕ пай пенси çине каять, унсăр пуçне çынсене пуласлăхра пенсипе тивĕç терет.
РФ Пенси фончĕн Комсомольски районĕнчи управленийĕ.
Источник: "Каçал Ен"