29 марта 2014 г.
Çур аки алăкран шаккать. Çурхи уй-хир ĕçĕсене пурнăçлама техника юсавлă, çунтармалли-сĕрмелли материалсем, им-çам, вăрлăх çителĕклĕ пулни чи кирли. Унпа пĕрлех ял хуçалăхĕнче тăрăшма хатĕр кадрсем те пулмаллах. Паянхи кун хăш-пĕр хуçалăхсенче механизаторсем çитменни чăрмав кăларса тăратать. Акана тухмалли техникăна тĕрĕслеме районта ятарлă комисси туса хунă. Комисси членĕсем мартăн 26-мĕшĕнче "Слава картофелю" агрофирмăра пулчĕç. Кунта акана тухмалли техникăна пĕтĕмпех йĕркене кĕртнĕ. "Слава картофелю" агрофирма - районти чи пысăк хуçалăхсенчен пĕри. Вăл çĕр улмине хамăр тăрăхра çеç мар, Елчĕк, Канаш районĕсенчи уй-хирте те çитĕнтерет. Апла пулсассăн хуçалăхра çителĕклĕ техника, ĕçченсем пулни пĕрремĕш вырăнта. Пысăк хăватлă "Джон Дир" тракторсене ĕçре тăрăшулăхпа палăрнă механизаторсене шанса панă. Вĕсем ĕçе вăхăтра тата пахалăхлă пурнăçлас тесе тимлеççĕ. Г.В.Карсаков, Г.В.Миронов, А.И.Мартынов, Д.Г.Ильин механизаторсем шанса панă хăватлă тракторсемпе ĕçлеме меллĕ пулнине палăртаççĕ. Вĕсем ыран-паян акана тухма хатĕр. Кунта тăрăшакансем çурхи ака-суха ĕçĕсене кĕске вăхăтра тата пахалăхлă пурнăçласси ытларах хăйсенчен килнине лайăх ăнланаççĕ. Вĕсем шанăçа тỹрре кăларасси пирки ертỹçĕсемпе специалистсем иккĕленмеççĕ те. - Тракторсене, прицепсене ĕçе пуçăнма лайăх хатĕрленĕ. Юсав ĕçĕсене пурнăçланă. Кунта, паллах, агрофирмăра тăрăшакансен ĕçченлĕхне палăртса хăвармалла. Агрофирма механизаторĕсем яллă вырăнта çеç мар, федераллă трасса çинче те çỹреççĕ. Çавна май уйрăмах çул çинче тимлĕ пулмаллине каласа хăварасшăн. Çул-йĕр правилисене çирĕп пăхăнăр, техника юсавлăхне тĕрĕслесех тăрăр, - терĕ тĕрĕслеве пĕтĕмлетсе патшалăх техника надзорĕн районти тĕп инспекторĕ Сергей Николаевич Кокарев.
А.ВЛАДИМИРОВА.
Источник: "Каçал Ен"