16 октября 2013 г.
Нумаях пулмасть районта «Семья года — 2013» конкурса пĕтĕмлетрĕç. Республикăра район чысне çитес вăхăтра Любовь Владимировнăпа Андрей Фирсович Мамуткинсем хÿтĕлĕç. Сăмах май, мăшăр пĕрле 16 çул ытла пурăнать. «Пĕрре курсах юратса пăрахрăм. Шăпах çавăн пек ятлă район шайĕнче иртекен конкурсра паллашрăм та ĕнтĕ эпĕ мăшăрăмпа», — тет çемье пуçĕ.
Мамуткинсен виçĕ ача: Артем, Роман тата Мария. Вĕсем те, ашшĕ-амăшĕ пекех, спортпа тата физкультурăпа туслă. Çемье районта тата республикăра иртекен ăмăртусене, конкурссене хутшăннă, хутшăнать те.
«Çемье вăл — шанчăклăх, юрату, ăнланупа килĕшÿлĕх», — теççĕ Мамуткинсем.
Мĕнех, республика шайĕнче район чысне ăнăçлă хÿтĕлеме ăнăçу сунатпăр вĕсене!
Источник: "Каçал Ен"