28 февраля 2015 г.
Йăлмахва ялĕнче Çăварни уявĕ ачасем ял тăрăх çунашкасемпе ярăнса аннипе пуçланчĕ. Çакă вăл çурхи шыв юххине çул уçса панине пĕлтерет. Кайнлăк ял тăрăхĕн пуçлăхĕ А.Г. Кузьмин, ЧР тава тивĕçлĕ учителĕ П.Е. Рыжов, ветерансен совечĕн председателĕ З.Н. Григорьева, педагогика ĕçĕн ветеранĕ Л.М. Абусева пухăннисене ăшшăн саламларĕç.
Культура çурчĕ çумĕнчи фольклор ушкăнĕ уява малалла тăсрĕ. Вĕсен Çăварнине халалланă программи тарăн та пуян пулчĕ. Пухăннă халăх Çăварни юррисем шăрантарчĕ. Çакăн хыççăн вара хĕле ăсатса çуркуннене кĕтсе илчĕç.
Ратне юррисен конкурсĕнче Смирновсем, Алякинсем, Ефремовсем, Албутовсем, Яковлевсем, Черновсем, Рыжовсем палăрчĕç. "Чи хитре çунашка" конкурсра П.Е. Рыжов çунине çитекенни, "Чи хитре Çăварни тумĕ" конкурсра вара Е.Н. Албутовăран хитри пулмарĕ. Уява хутшăнакансене В.К.Яковлевăпа И.Г. Смирнова икерчĕпе тата тутлă чейпе сăйларĕç.
Уявра спорт вăййисем питĕ интереслĕ иртрĕç: алă вăйĕ виçесси, кире пуканĕ çĕклесси, вĕрен туртасси, чỹлмек çĕмĕресси, улăм тултарнă миххе ывăтасси... Пĕве çинче вара футболла вылярĕç. Кунта арçынсем те, хĕрарăмсем те хутшăнчĕç. Уява пухăннисем катаччи чупса савăнчĕç.
"Çăварни, Çăварни" кĕнеке куравĕ пе алă ĕçĕсен выставки умĕнчен халăх татăлма та пĕлмерĕ. Уйрăмах Л.М. Абусева, С.А. Ефремова, З.Е. Ефремова, З.Н. Григорьева, В.К. Яковлева, Г.Ф. Ефремова, Г.В. Ефремов, А.Г. Кузьмин, О.А. Ефремов ĕçĕсем куракансене килĕшрĕç.
Юлашкинчен пухăннисем пĕр-пĕринчен каçару ыйтса "Çăварни карчăккине" çунтарса ячĕç, усал-тĕселпе чир-чĕре хăваларĕç.
Çăварни уявне ирттерме пулăшакансене тата спонсорла пулăшу панисене уйрăмах тав сăмахĕ калас килет: Л.М. Абусевăна, З.Н. Григорьевăна, П.Е. Рыжова, В.К. Яковлевăна, Г.Г. Смирнова, А.И. Дмитриева.
Источник: "Каçал Ен"