24 апреля 2013 г.
Тавралăха тирпей-илем кĕртес енĕпе санитарипе экологи уйăхлăхĕ пырать. Пурин умĕнче те тăракан тĕп тĕллев — юр ирĕлнĕ хыççăн çул хĕррисене, тротуарсене, çурт-картиш таврашĕсене, ача-пăча вылямалли лапамсене, газонсене, мемориал комплексĕсене тата асăну вырăнĕсене тасатса тирпейлесси, вĕсене йĕркене кĕртесси. Ялсенчи çырма хĕррисене манса хăвармалла мар, мĕншĕн тесен нумай çĕрте шăпах çакнашкал кĕтессем çÿп-çап тăкмалли вырăнсем пулса тăраççĕ. Темшĕн çынсем пурăнакан вырăна çакăн пек варалаççĕ. Çырма хĕррисене çеç мар, вăрмана та халăх сĕмсĕррĕн илемсĕрлетет. Паян кайса кур-ха эсĕ вăрмана — шалт тĕлĕнмелле ÿкерчĕк унта. Купипех çÿп-çап, кĕленче, пластик савăтсем, хăшĕ-пĕри ача памперсĕсене те унтах килсе тăкнă. Теприсем ĕçнĕ-çинĕ, шашлăк пĕçернĕ те, хăйсем хыççăн пуçтармасăрах пăрахса хăварнă. Çут çанталăкран кулниех мар-и çакă?
Иртнĕ эрнере нумай организаципе предприятисенче тăрăшакансем субботниксем ирттерчĕç. Вĕсем тавралăха илем кĕртес тесе урамсенчи, çурт умĕнчи çÿп-çапсене пуçтарчĕç, çунтарчĕç. Чечексем акма çĕр хатĕрлерĕç. Пĕрле кар тăрса ĕçлесен çеç палăртнине пурнăçлама пулать. Çавăнпа та кашниех экологи субботникне хастар хутшăнасса шанатпăр. Тавралăх пире хăйĕн илемлĕ сăн-сăпачĕпе савăнтартăр.
Источник: "Каçал Ен"