Публикации » Ватăсене саламлама

14 марта 2012 г.

Аннесене Пĕтĕм тĕнчери Хĕрарăмсен кунĕ ячĕпе саламласси йăлана кĕнĕ ĕнтĕ. Хирти Мăнтăрти информаципе культура центрĕн ĕçченĕсем вара кашни çулах çак кун Ваттисен çуртĕнче кинемейсене саламламасăр хăвармаççĕ. Кăçал та агитбригада ятарлă программа хатĕрлесе Хирти Мăнтăрти Ваттисен çуртне çитрĕ. Художество руководителĕ В.В.Данилов чи ырă та çепĕç сăмахсемпе кинемейсен чун-чĕрисене ăшăтрĕ, çирĕп сывлăхпа телей сунчĕ. Культура тытăмĕн ĕçченĕсем «Лашисене шăварнăччĕ», «Пурнăç урапи такăнать», «Ах, аннеçĕм, анне», «Чĕрере анне ялан» тата ытти юрăсене шăрантарса ватăсене савăнтарчĕç. Ветерансем агитбригада членĕсене чĕререн тав туса ăсатрĕç.

Источник: "Каçал Ен"