Публикации » Юсав ĕçĕсем пыраççĕ

Хирти Мăнтăр культура çуртĕнче юсав ĕçĕсем хĕрÿ пыраççĕ. Кирпĕч çурта çиелтен сайдинг çапса илемлетеççĕ. Шалта вара алăксене, урай хăмисене улăштараççĕ. Халĕ «Комсомольский стройсервис» ĕçченĕсем çĕнĕ медпункт кабинетне йĕркене кĕртеççĕ. Каярахпа стенасене шалтан сăрласа илемлетме малярсен бригади килсе çитĕ.

Çавăн пекех кунта «Тав» организацирен шыв кĕртекенсен бригади ĕçлет. Картишĕнче пусă чавса хунă та ĕнтĕ. Культура çуртĕнче тăрăшакансене шывпа тивĕçтерес тесе ырми-канми вăй хураççĕ вĕсем, ĕçсем часах вĕçленессе палăртаççĕ.

«Турă ыр çанталăк парсан пĕр-икĕ кунран хамăр ĕçе пĕтеретпĕр, — палăртать платниксен бригадирĕ М.Гибатдинов. — Çумăр анчах çуса ан чăрмантартăрччĕ».

Кайнлăк ял поселенийĕ тендер выляса илнипе культура çуртне юсама май килчĕ. Нумаях пулмасть Хирти Мăнтăрти вăтам шкулта юсав ĕçĕсем ирттернĕччĕ, спортзал тăррине çĕнĕрен витнĕччĕ. Черетре вара — çак ялтах вырнаçнă ача сачĕ. Унта та часах ĕçсем пуçланĕç.