Публикации » ВЕТЕРАНСЕНЕ ЧЫСЛАРĔÇ

Кайнлăк ял поселенийĕнче вăрçă ветеранĕсене чыслăн сума сурĕç. Йăлмахвари вăрçă ветеранĕсем, тыл ĕçченĕсем митинга пуçтарăнчĕç. Ăна Кайнлăк ял поселенийĕн пуçлăхĕ С.Н.Журавлев уçрĕ.

Уяв ячĕпе саламласа ветерансен совечĕн председателĕ З.Н.Григорьева, «Дубрава» ял хуçалăх кооперативĕн ертÿçи М.Г.Шарафутдинов сăмах каларĕç.

В.Н.Чаржов ветеран вăрçă вăхăтне аса илчĕ, ачасене лайăх вĕренме сĕнчĕ. Йăлмахва шкулĕнче вĕренекенсем концертпа саламларĕç.

Уява малалла Йăлмахвари тĕслĕх библиотекинче тăсрĕç. Чи малтанах «Энциклопедия Комсомольского района» кĕнекен презентацийĕ пулчĕ. Унпа З.Н.Григорьева тĕплĕн паллаштарчĕ. Тĕрлĕ сĕнÿсем пулчĕç, иккĕмĕш кĕнеки тухасса шаннине пĕлтерчĕç вĕсем. Ветерансем вăрçă вăхăтне аса илчĕç.

Тĕрлĕрен юрăсем юрларĕç, Вера Чаржова вара хăй çырнă юррине юрласа пачĕ. Йăлмахва тĕп шкулĕнче пионервожатăйра ĕçленĕ Л.М.Абусева вăрçă çинчен сăвă вуласа пачĕ.

Ветерансем çавра сĕтел хушшинче чейпе хăналанчĕç. Çакăн пек уяв туса панăшăн вĕсем чунтан савăнчĕç. Пурне те тав сăмахĕ каларĕç.

Çак мероприятие ирттерме М.Г.Шарафутдинов спонсорла пулăшу пачĕ.