16 июня 2017 г.
санкасси ялĕ питĕ илемлĕ вырăнта вырнаçнă. Ял варринче капăр чечексем хушшинче фельдшерпа акушер пункчĕ ларать. Унта тăрăшакан Елена Семенова ача-пăча медсестри хăй те çак çеçкесем евĕр чипер те маттур.
Кăмăла каякан професси çулне вăл 10 çул ытла такăрлатать. Асăннă ял тăрăхĕнчи фельдшерпа акушер пунктне çỹрекенсем ун пирки ыррине çеç калаççĕ.
- Вăл хăйне шанса панă ĕçе тĕплĕ тата вăхăтра пурнăçлаканскер. Елена Александровна пире, пациентсене, эмелпе кăна мар, ырă сăмахпа, ăшă йăл-кулăпа та сиплет. Ачасемшĕн вара каçсах каять. Ун пирки профессине тĕрĕс суйласа илнисенчен пĕри тесех каламалла, - тет Асанкасси ял тăрăхĕн специалист-эксперчĕ Римма Горбунова.
- Шурă халат тăхăннă çынсене ача чухнех кăмăллаттăм, вĕсем мана пирĕшти пекех ту-йăнатчĕç. Çавна пулах шкултан вĕренсе тухсан Шупашкар хулине çул тытрăм. Тĕп тĕллев - шурă халат тăхăнасси, медицина ĕçченĕ пуласси, - паллаштарчĕ çамрăк чухнехи ĕмĕт-тĕллевĕпе Елена Семенова. - Мĕн пĕчĕкрен медицина ĕçченĕ пулма ĕмĕтленнĕрен-ши, ĕçе кашни кунах тулли те хавас кăмăлпа утатăп, пĕчĕк пациентсемпе вĕсен ашшĕ-амăшне тивĕçлĕ пулăшу парас тетĕп. Тинрех çеç кун çути курнă пепкесене прививкăсем тăватăп, вĕсен аталанăвне тĕрĕслетĕп. Ĕçĕ, чăнах та, чылай, анчах та шăпăрлансене чунтан юратни ĕçри йывăрлăхсене çĕнсе тухма вăй парать.
Асăннă тăрăхра Елена Александровна 7 çул тăрăшать. Ĕçри пĕрремĕш утăмсене вăл тĕп хулари медицина пункчĕсенчен пĕринче тунă. Тинрех çеç медицина училищинчен вĕренсе тухнă çамрăка унта направленипе янă пулнă. Унти опытлă ĕçченсем хĕре ĕçе хăнăхтарнă, вăрттăнлăхсемпе тĕплĕнрех паллаштарнă. Лена Шупашкарти поликлиникăри участокри терапевт çумĕнче 4 çул ĕçленĕ.
Асанкасси йĕкĕчĕ хĕре пĕрре курсах килĕштернĕ. Тупнă телей кайăкне алăран вĕçертес темен Павел. Ялта çĕнĕ çемье чăмăртаннă. Килĕшỹллĕ мăшăр, Еленăпа Павел Семеновсем, икĕ ачана, ывăлпа хĕре пурнăç парнеленĕ. Çемье çавăрнăранпа çирĕм çул иртнĕ пулин те унта, малтанхи пекех, килĕшỹпе туслăх, ăнланупа юрату хуçаланаççĕ. Ачисем ỹссе çитĕннĕ ĕнтĕ, ашшĕпе амăшне вăй çитнĕ таран пулăшма тăрăшаççĕ. Евгений ывăлĕ Çĕнĕ Шупашкарта професси пĕлĕвĕ илнĕ хыççăн яла таврăннă. Салтак атти тăхăнма вăхăт çитнĕ яш халĕ тăван тăрăхра сварщикре ĕçлет. Хĕрĕ, Настя, амăшĕн çулне суйлас тенĕ. Вăл Канашри колледжра 1-мĕш курсра ăс пухать, медицина ĕçченĕ пулас ĕмĕтпе пурăнать.
А.ИСАЕВА
Источник: "Каçал Ен"