12 декабря 2015 г.
Çак кунсенче Асанкасси вăтам шкулĕнче Совет Союзĕн Геройĕ Ф.Н.Чернов ячĕпе ирĕклĕ майпа кĕрешекенсен республикăри 25-мĕш турнирĕ иртрĕ.
Ăмăртăва хуçасемсĕр пуçне Йĕпреç, Канаш, Елчĕк, Шăмăршă районĕсенчи тата Чĕмпĕр облаçĕнчи 100 ытла спортсмен килсе çитнĕ. Хăшпĕр районсенчен 2-3 команда та хутшăнчĕ. Çакăн чухлĕ кĕрешỹçĕ пуçтарăнни ăмăртăвăн пĕлтерĕшне татах та анлăлатрĕ.
Пуçтарăннисене чи малтанах Шупашкар хулин ирĕклĕ майпа кĕрешекенсен федерацийĕн Президенчĕ В.М.Семенов, район администрацийĕн представителĕ В.Н.Гаврилов, Асанкасси ял поселенийĕн пуçлăхĕ Н.Н.Карпов, "Асаново" ЯХПК ертỹçи А.Н.Бахтеров, Асанкасси вăтам шкулĕн директорĕ А.И.Филиппов тата ыттисем саламларĕç.
- Кашни çулах çак турнира хутшăнма пысăк кăмăлпа килетĕп. Çултан-çул ăмăртусем çỹллĕ шайра иртни, кăтартусем хушăнса пыни ĕçлемесĕр пулмасть. Шăпах çак тĕллевпе ĕçлет те шкулти физкультура учителĕ Г.Н.Петухов. Вăл 24 çула яхăн пĕтĕм чунне парса ял çамрăкĕсене кĕрешме вĕрентет. Республика, Раççей турнирĕсен чемпионĕсем мĕн чухлĕ хатĕрленĕ пуль, - терĕ В. Семенов.
Арçын ачасем 9 виçере вăй виçрĕç. 32 кг хушшинче пĕрремĕш вырăна Владимир Шамбиков çĕнсе илчĕ. Анат Тимĕрчкасси спортсменĕ Кирилл Тимофеев - иккĕмĕш, виççĕмĕш вырăнта - Михаил Виноградов (Канаш хули).
35 кг ачасем хушшинче Канаш район каччи Алексей Албутов вăйлăрах пулчĕ. Сергей Парфенов (Анат Тимĕрчкасси) - иккĕмĕш, Антон Георгиев (Канаш) - виççĕмĕш вырăнсенче.
42 тата 46 кг виçесенче Елчĕк районĕнчи Руслан Галошевпа Чĕмпĕр облаçĕнчи Михаил Ширтанов пурне те парăнтарса мала тухрĕç. Асанкассинчи Даниил Митюков виççĕмĕш вырăна тивĕçрĕ.
50 кг виçере чемпион ятне Анат Тимĕрчкассинчи Денис Андреев çĕнсе илчĕ. Станислав Пыркин (Асанкасси) - виççĕмĕш.
54 кг виçере Артем Катмаков (Асанкасси) иккĕмĕш вырăна тивĕçрĕ.
58 тата 63 кг спортсменсем хушшинче республика чемпионĕ ята Асанкассинчи Константин Калашниковпа Александр Яковлев çĕнсе илчĕç.
Çак турнирта чи пĕчĕк виçере (26 кг) Денис Яндров вăйлăрах пулчĕ. Андрей Филипповпа Андрей Тимофеев иккĕмĕшпе виççĕмĕш вырăнсене тивĕçрĕç. Хĕрсенчен 40 кг кĕрешỹçĕсем хушшинче Асанкасси хĕрĕ Вика Карпова - иккĕмĕш вырăнта.
52 кг виçере Асанкасси хĕрĕ Снежана Школьникова - иккĕмĕш.
Анат Тимĕрчкассинчи Карина Степанова 56 кг виçере мала тухрĕ. Çак виçерех Людмила Суюкова (Асанкасси) - иккĕмĕш вырăнта.
Республика турнирĕ чăннипех те çỹллĕ шайра иртрĕ. Çак ăмăртăва ха-тĕрлесе ирттерме пулăшнăшăн "Асаново" ЯХПКна, Асанкасси вăтам шкулĕн коллективне, уйрăм спонсорсене тав сăмахĕ каласа хăвармалла.
Ял çамрăкĕсем унччентерех хăйсем те маттур кĕрешỹçĕсем пулнă. Дмитрий Портнов, Олег Данилов, Михаил Иванов, Валерий Денисов, Сергейпе Евгений Копташкинсем, Сергей Кондратьев тата ыттисем те яланах пулăшма хатĕр. Тавах вĕсене.
В.ГАВРИЛОВ
Источник: "Каçал Ен"