02 апреля 2014 г.
"Асаново" ял хуçалăх кооперативĕн ĕçченĕсене Наталья Беловăпа Вера Яковлева - пĕртăвансем, хуçалăхăн сĕт-çу ферминче çума-çумăнах ĕçлеççĕ. 2013 çул пĕтĕмлетĕвĕсемпе аппăшĕпе йăмăкĕ - районти чи пултаруллă дояркăсен шутĕнче. Наталья Белова пĕр ĕне пуçне 7769 килограмм, Вера 7014 килограмм сĕт суса илнĕ. Вĕсемпе пĕрле тăрăшакан Людмила Чижикова та питĕ хастар, ăна шанса панă кашни ĕне пĕлтĕр вăтамран 7491 килограмм сĕт антарнă. Натальйăпа Вера Асанкасси ялĕнче çуралса ỹснĕ. Вăтам шкулти вĕренỹ хыçа юлсан тантăшĕсемпе пĕрле хулана тухса кайман хĕрсем, тăван хуçалăхрах ĕçлеме юлнă. Шкул саккинчен ансанах сĕт-çу фермине ĕне сума вырнаçнă та, паян кун та çавăнтах вăй хураççĕ."Ача çуратсан çеç кăштах килте ларнă" - теççĕ. Хăйсен ĕçне чунтан парăннăскерсем вĕсем, çавăнпах ячĕшĕн ĕçлеме, кайри пулма хăнăхман. Йывăр тесе палăртнинчен нихăçан та каялла чакман. Хуçалăх выльăхсен рационне пуянлатнипе, ĕне сăвакан операторсем ĕçне юратса пурнăçланипе, тăрăшнине кура çитĕнĕвĕсем те кĕттермен. Акă, 2012 çулта вĕсем пĕр ĕнерен 6000 килограмм ытларах сунă пулсан, 2013 çулта районта халиччен пулман рекорд лартма пултарнă. Наталья Александровнăна вара ĕçтешĕсем çичĕ пинлисен клубне ертсе пыма шанчĕç. Чăннипех пысăк чыс çакă çирĕм тăваттăмĕш çул пĕр вырăнта улшăнмасăр ĕçлекеншĕн. Пĕртăвансем сунă сĕте пĕр çĕре пухсан питĕ пысăк кỹлĕ е тинĕс те пулĕччĕ-ши? Унăн вĕçне-хĕрне те тухма çук пуль тесе шутлатăп. Маттур хĕрарăмсене малашне те паянхи пекех ĕçчен те хастар пулма, малтисен ретĕнче пыма çирĕп сывлăх, вăй-хал сунатпăр. Тунă çитĕнỹсемпе лăпланса ларманнисем çеç хăйсен тĕллевĕсене пурнăçлаяççĕ.
Л.ШУРЯШКИНА.
Источник: "Каçал Ен"