25 сентября 2013 г.
«Ĕнен сĕчĕ — чĕлхи çинче», — тенĕ ваттисем мĕн ĕлĕкех. Выльăх-чĕрлĕхе мĕнле апатлантарнинчен , пăхнинчен продукци туса илесси нумай килет.
Сĕт-çу фермисене хĕле епле хатĕрленине тĕрĕслес тĕллевпе ятарлă комисси районти ял хуçалăх предприятийĕсемпе фермер хуçалăхĕсене тата колхозсене çитсе унти лару-тăрупа паллашать. Комисси членĕсем çак кунсенче чылай хуçалăхра пулчĕç те.
«Асаново» хуçалăхри ĕç-хĕлпе А.Н. Бахтеров председатель паллаштарчĕ:
—Пĕтĕмĕшле илес пулсассăн, ĕне витисене юсанă, вырăн-вырăн урай хăмисене улăштарнă. Çамрăк пăрусене тытма ятарлă вырăн тунă. 6 уйăхран иртнĕ пăрусене выртса тăма «ковриксем» туянма укçа-тенкĕ куçарнă, вĕсене ыран-паян кÿрсе килмелле. Хĕле кĕриччен пурнăçламалли ĕçсем пур-ха, витесене шал енчен шуратмалла.
«Асаново» кооперативра паянхи куна сăвакан 160 ĕне, вĕсемпе 7 доярка ĕçлет. Пăрусене 2 ĕçчен пăхать. Çулталăкне вăтамран 100 ĕне пуçне 57 пăру илеççĕ. Выльăх-чĕрлĕх валли кооперативра çителĕклĕ апат хатĕрленĕ: 500 тонна утă, 1200 тонна сенаж, 820 тонна силос.
«Восток» ЯХПК-ра выльăх-чĕрлĕх витисене хĕл каçма хатĕрлесе çитернĕ тесен те юрать. Вите стенисене шал енчен шуратнă, çакă тĕрлĕ чир-чĕртен сыхлать. Ĕнесем, пăрусем тăракан вырăнсене юсанă. Пур ĕçе хуçалăхри ĕçченсем пурнăçланă.
— Выльăх-чĕрлĕх хуçалăхсене аван тупăш кÿрет. Ĕнесене паха апат çитерсен сĕт антарасси ÿсет, пăрусене лайăх пăхсан — ÿт аван хушаççĕ. Çавăнпа та çителĕклĕ апат хатĕрлени, витесене юсаса çĕнетни, тирпейлени выльăх-чĕрлĕх продукцине туса илессине палăрмаллах ÿстереççĕ. Ку енĕпе хăш-пĕр хуçалăхсем тăрăшса ĕçленине палăртма кăмăллă — терĕ ял хуçалăх тата экологи пайĕн начальникĕ Илдус Миннетуллин.
Источник: "Каçал Ен"