25 мая 2013 г.
Майăн 22-мĕшĕнче Комсомольски вăрманĕ çывăхĕнче ракетомодельлĕ спортпа А.Г.Николаев летчик космонавтăн кубокне çĕнсе илессишĕн республикăри IХ Спартакиада иртрĕ. Сăмах май, ăмăртăва 7 çултисенчен пуçласа 17 çулхи арçын ачасемпе хĕр ачасем хутшăнчĕç. Çак мероприятие йĕркелекенсем — Чăваш Республикин Вĕренÿ тата çамрăксен политикин министерствин ачасене хушма пĕлÿ паракан «ЮНИТЭКС» центрĕ, вырăнти ДОСААФ уйрăмĕ. Малтан 16 команда ăмăртăва хутшăнма заявка панă пулсан, шел пулин те, 7-шĕ кăна тупăшма кăмăл тунă.
Чи малтанах район администрацийĕн вĕренÿ пайĕн начальникĕ Николай Максимов, тĕп специалисчĕ Алексей Яковлев, РФ ДОСААФĕн вырăнти уйрăмĕн начальникĕ Александр Абрамов, Комсомольскинчи ачасене хушма пĕлÿ паракан центр директорĕ Светлана Самарина тата ыттисем те спортсменсене ăнăçу сунчĕç.
Тупăшу 5 тапхăрпа иртрĕ. Ăмăртăвăн тĕп судйи Владимир Сенчихин ачасем тĕплĕн хатĕрленнине палăртрĕ.
Кунта район чысне Асанкасси вăтам шкулĕнче вĕренекенсем — Е.Терентьев (9-мĕш класс), А.Школьников, С.Пыркин, М.Емельянов (виççĕшĕ те саккăрмĕшсем) тата 7-мĕш класра пĕлÿ пухакан Э.Карпов — хÿтĕлерĕç. Вĕсене хатĕрлекенĕ — технологи учителĕ Вячеслав Максимович Салаев.
Асанкассисем ăсталăхне кăтартнă хыççăн вĕсемпе курса калаçрăм. «Ракетомодельлĕ спортра çитĕнÿсем тăвас тесен физика, хими, черчени тата ытти предметсемпе те лайăх вĕренмелле», — терĕç вĕренекенсем пĕр шухăшлăн.
Темиçе сехете пынă тупăшура вĕренекенсем ăсталăхне кăтартса командăсенчен пĕрре-мĕшсем Çĕнĕшупашкарсем, иккĕмĕшсем Муркашсем пулчĕç. Асанкасси вăтам шкулĕн команди виççĕмĕш вырăна çĕнсе илчĕ. Унта пĕлÿ пухакан Женя Терентьев вара конкурсăн 4-мĕш тапхăрĕнче ракета копине ăсталаса республикăра пĕрремĕш вырăна тухрĕ. Çĕнтерÿçĕсене Хисеп грамотисемпе, кубоксемпе тата парнесемпе чысларĕç.
Ăмăртăва йĕркелекенсем А.Абрамовпа В.Салаева Хисеп грамотисемпе, С.Самаринана Тав хучĕпе наградăларĕç.
М.АЛЕКСЕЕВА.
Источник: "Каçал Ен"