Публикации » Службăра тăни чыс çеç мар,

Президент полкĕ патшалăхăн пĕрремĕш çыннисене тата Кремльти пурлăха упрассипе тимлет. Пулас салтаксенчен нумайăшĕ унта службăна лекме ĕмĕтленет. Çак чаçе çамрăксене тĕплĕн суйласа илеççĕ, мĕншĕн тесен Президент полкĕнче хĕсметре тăни чыс çеç мар, пысăк яваплăх та.

Кăçалхи кĕрхи призывра Комсомольски тата Елчĕк районĕсенчен асăннă чыса тивĕçнĕскер — Александр Широков. Вăл Асанкассинче çуралса ÿснĕ. Вăтам шкул пĕтерсен Чăваш патшалăх педагогика университетĕнче ÿнер искусствин учителĕ пулма вĕреннĕ.

«Президент полкне хĕсмете лекме эпĕ ĕмĕтленме те пултарайман. Чăваш ятне çÿлти шайра тытăп»,— терĕ Александр, хăйне ăсатма килнĕ тус-тăванĕсене, ял-йыша шантарса.

Призывникăн ашшĕпе амăшĕ ялта хисепе тивĕçлĕ çынсем. Владимир Георгиевич «Асаново» ЯХПКра рабочире тăрăшать. Валентина Александровна вара чылай çул Асанкассинчи ветеринари участокĕнче ветфельдшерта ĕçлет. Сашăн пиччĕшĕ те аслă пĕлÿллĕ. Йăмăкĕ Ирина ялти шкулта вĕренет.

«Хĕсметрен каччăсем чăн-чăн ар çын пулса таврăнаççĕ»,— тăсрĕ малалла калаçăва ЧР çар комиссариачĕн Комсомольски тата Елчĕк районĕсенчи уйрăмĕн ĕçченĕ Юрий Венедиктов.

— Кăçалхи кĕрхи призывра республикăран Президент полкне 15-ĕн кайрĕç. Урăхла каласан, унта лайăххисенчен те чи лайăххисене суйласа илеççĕ. Эпир районтан икĕ каччăна илсе кайнăччĕ. Александр Широкова Президент полкĕнчен килнĕ представитель пĕр сăмахсăрах документсемпе паллашнă хыççăн суйласа илчĕ,— терĕ Юрий Владимирович.

Инçе çула тухас умĕн ЧР çар комиссариачĕн Комсомольски тата Елчĕк районĕсенчи уйрăмĕн начальникĕ Андрей Маурин, район администрацийĕн вĕренÿ пайĕн начальникĕпе специалисчĕ Николай Максимов тата Гузель Гадельянова призывника ырă сунса сăмахсем каларĕç.

Президент полкĕнчен тăван яла нумаях пулмасть таврăннă Динар Зейдуков (Урмаел каччи) А.Широкова ăнăçу сунчĕ.