Публикации » Япăх мар кăтартупа таврăннă

Асанкасси вăтам шкулĕнче вĕренекенсем çулсеренех республикăра ирттерекен «Çул-йĕрĕн çамрăк инспекторĕсем» конкурса хутшăнаççĕ. Кăçал вăл Муркаш районĕнчи сывлăха çирĕплетекен «Солнышко» ача-пăча лагерĕнче иртнĕ. Унта пурĕ 27 команда хутшăннă. Конкурс тĕллевĕ — ачасем хушшинче çул-йĕр правилисем тĕлĕшпе профилактика ĕçĕсем пурнăçласси, çул çинче сусăрланасран асăрхаттарасси. Çак мероприятире пирĕн район чысне Асанкасси вăтам шкулĕнчи Снежана Андреева (капитан), Мальвина Карсунова, Александр Яковлев, Артем Катмаков хÿтĕленĕ. Вĕсем пурте 5-мĕш класра пĕлÿ пухаççĕ, команда ячĕ — «Волшебники двора». Вĕсемпе технологи учителĕ (производство вĕрентĕвĕн мастерĕ) Н.В.Данилов ĕçлет. Хавхалантарса пырать.

Ачасем хăйсен пĕлĕвĕпе ăсталăхне «Çул-йĕр правилисене чи лайăх пĕлекен» (командăпа та, уйрăммăн та), «Автохулара велосипедсемпе тĕрĕс çÿресси», «Велосипедсемпе тĕрлĕ фигурăсем туса ярăнасси», «Пурнăç сыхлавĕн никĕсне пĕлесси» конкурссенче тупăшнă. Çавăн пекех творчество конкурсĕ те пулнă. Унта вĕсен тĕрлĕ майсемпе (художество пултарулăхĕпе, хăйсем хатĕрленĕ агитаци хатĕрĕсемпе) çул-йĕр çинче инкек сиксе тухасран асăрханмаллине кăтартнă.

«Хăрушсăрлăх кустăрми» ят панă темиçе конкурса пĕрлештерекен ăмăртура асанкассисен команди 3-мĕш вырăн çĕнсе илнĕ. Хастарлăхпа пултарулăхшăн вĕсем Хисеп грамотисене, хаклă парнене — магнитофона — тивĕçнĕ.

Командăна Н.В.Данилов чăннипех те ăнăçлă хатĕрленине палăртмалла. Малашне те вĕсене ăнăçу сунас килет.