Публикации » Гурий Рипанова асăнса – турнир

Г.Рипанов 1933 çулта Асанкасси ялĕнче çуралнă. Мĕн пĕчĕкренех летчик пулма ĕмĕтленнĕ. Хурамалти вăтам шкултан вĕренсе тухсан ăна Комсомольскинчи çар комиссариачĕ Актюбинск хулинчи çар училищине летчика вĕренме янă. Унтан вĕренсе тухсан Гурий Назарович летчик-испытатель пулса тăнă.

Юлашки вĕçевĕнче Г.Рипановăн истребителĕн моторĕ сасартăк чарăннă. Вăл самолета хула çине ÿкерес мар тесе трагедилле вилнĕ. Ку ĕç Могилев облаçĕнче пулса иртнĕ. Паттăра Брянск облаçĕнчи Тăванла масара пытарнă.

Асанкасси çыннисем хамăр ентеш ятне асра тытаççĕ, унпа мăнаçланаççĕ. Кăçалхи çул та паттăра асăнса турнир ирттерчĕç. Волейбол турнирĕ 10-мĕш хут пулчĕ.

Ăмăртăва 5 команда хутшăнчĕ. Чи малтанах шкул директорĕ Н.И.Чумаков, физкультура учителĕ Г.Н.Петухов, ял поселенийĕн пуçлăхĕ Н.Н.Карпов, «Асаново» ЯХПК ертÿçи А.Н.Бахтеров спортсменсене саламласа сăмах тухса каларĕç, ăнăçу сунчĕç.

Тупăшура Урмаел ял поселенийĕн спортсменĕсем пĕрре-мĕш вырăна çĕнсе илчĕç. Иккĕмĕшпе виççĕмĕш вырăнсене Шурут тата Комсомольски (Фасхутдинов команди) ял поселенийĕсен командисем тивĕçрĕç. Çĕнтерÿçĕсене парнесем пачĕç.