Публикации » Кашни пĕрчĕ шутра

Иртнĕ çулсенчи вырмара йĕтемсем çинче ку вăхăтра шăв-шав кĕрлесе тăратчĕ. Кăçал вара кирек хăш хуçалăха çитсен те — ĕçлекенсем те сахалрах, тырă куписем те самай пĕчĕк. Çынсен питĕнче пăшăрхану палăрать.

«Асаново» ЯХПК йĕтемĕ çинчи ĕçе икĕ сменăпа йĕркеленĕ. Урпа вырма хире виçĕ комбайн тухнă. Яланхи пекех вĕсен штурвалĕ умĕнче — чылай çул ĕçлекен Василий Кириллов, Владимир Кузьмин, Анатолий Салаев. Çакăн пек шăрăхра техникăпа уйра çÿресси пĕртте çăмăл мар. «Хурçă карапсем» хыççăн улăма тюклама Евгений Пыркин ĕлкĕрсе пырать. Суха тунă çĕрте Борис Чижиков хăйĕн хăватлă Т-150 тракторĕпе ырми-канми вăй хурать. Пăчă, йывăр тесе лараймăн çав. Çĕре кĕр акине хатĕрлесе çитермелле. Çанталăк лайăх енне улшăнасса кĕтет çĕр ĕçченĕ. Урпана сортлас тĕлĕшпе Валерий Миронов (сăн ÿкерчĕкре) тăрăшать. Паллах, эпир пур ĕçе те унчченхипе танлаштаратпăр.

— Урпан тухăçĕ пысăк мар, çавăнпа та виçĕ хутчен тасатса илме ÿркенместпĕр. Халĕ кашни пĕрчĕ шутра. Тыр-пул пулсан выльăх-чĕрлĕх те тутă, пирĕн те сĕтел çăкăр-тăвартан пушă лармĕ,— тет Валерий Николаевич машинист. — Мĕнле пулсан та, мĕн пуррине пуçтарса кĕртмелле. Çапла, пур çул та пĕр пек килмест. Çут çанталăк памасан ыйтса илеймĕн. Нумайранпа çумăр çуманни ял хуçалăх кооперативĕсене, фермер хуçалăхĕсене питĕ пысăк тăкак кÿчĕ. Апла пулин те алă усса ларма вăхăт çук. Çитес çулхи тыр-пул пирки халех шутлама вăхăт. Хальлĕхе вара, ваттисем калашле, пĕрчĕн-пĕрчĕн пĕрне тултармалла.