Публикации » Асанкасси «шăпчăкĕн» пултарулăх каçĕ

Асанкассинчи Иван Портнова районта пĕлмен çын сахал пуль, мĕншĕн тесен вăл ертсе пынă «Çăлкуç» вокалпа инструментсен ансамблĕ çитмен ял таврара нумаях юлман-тăр. «Çăлкуç» юрри вара, 80-мĕш çулсен пуçламăшĕнче çырнăскер, халăхра анлă сарăлнă. Ăна паян кашниех юратса юрлатпăр, итлетпĕр. Иван Владимирович — юрăç тата композитор, Чăваш Республикин культурин тава тивĕçлĕ ĕçченĕ. Вăл вырăнти авторитет тесен те йăнăшмăп. Культура çурчĕн директорĕнче 35 çула яхăн тăрăшать. Яланах çынсен, çамрăксен канăвне йĕркелес, усăллă ирттерес тесе тимленĕ. Çемье чăмăртакан ял çамрăкĕсене те пĕрмаях юрăпа саламласа ăнăçу сунасси йăлана кĕнĕ кунта.

Иртнĕ кунсенче Иван Портнов 60 çул тултарчĕ. Çак сăлтавпа тăван клуба пурне те пултарулăх каçне йыхравларĕ.

Мартăн 13-мĕшĕнче Асанкассинчи культура çуртĕнче халăх лăк туллиехчĕ. Çакă — ял çыннисем, çамрăксем Иван Владимировича чунтан хисепленин паллиех ĕнтĕ. Концерт программине И.Портнов тĕрлĕ çулсенче кĕвĕленĕ юрăсенчен йĕркеленĕ. Унта тĕрлĕ темăпа хайланă произведенисене кĕртнĕ — юрату, ял пурнăçĕ, çынсем хушшинчи хутшăнусем. Ачасем валли те чылай юрă кĕвĕленĕ çак хушăра. Композитор хăй çуралса ÿснĕ, çарран чупнă, ĕмĕрне ирттернĕ тăрăхне чунтан юратнине палăртса кану каçне «Савнă ялăм» юрăпа пуçларĕ. «Паян уяв» ятли те питĕ вырăнлă пулчĕ.

Юбилярпа пĕрле сцена çине хĕрсен ушкăнĕ, художество пултарулăх ертÿçи Елена Маштанова, Николай Маргиданов юрăç, хăй тĕллĕн вĕреннĕ композитор та тухрĕç, илемлĕ юрăсем шăрантарчĕç. Асанкасси вăтам шкулĕнчи ачасен «Илем» фольклор ансамблĕ кăтартнă вăйăсене, юрра-ташша залра ларакансем хапăлласа йышăнчĕç, вĕсен пултарулăхне пысăк хак парса чылайччен алă çупрĕç. Настя Никифоровăпа Ирина Яковлева та пĕчĕкренех сцена искусствине юратса ÿсеççĕ, вĕсем Иван Владимирович кĕвĕленĕ «Кулине», «Вăрман уçланкинче» юрăсене янраттарчĕç.

Асанкасси ял поселенийĕн пуçлăхĕ Н.Н.Карпов, «Асаново» ял хуçалăх производство кооперативĕн председателĕ А.Н.Бахтеров, Г.Н.Петухов учитель-тренер, ял çамрăкĕсем Иван Владимировича сумлă юбилейпе саламласа ăшă та ырă сăмахсем каларĕç, парнесем пачĕç. Çак каçхине залра юбилярăн тăванĕсем те йышлăччĕ. Портновсем виçĕ пĕртăван çитĕннĕ. Йăмăкĕ, Нина Киреева, банк тытăмĕнче ĕçлесе тивĕçлĕ канăва тухнă. Пушă вăхăтра вăл сăвăсем çырма кăмăллать. Ун хăш-пĕр сăвви тăрăх шăллĕ юрă кĕвĕленĕ — «Хура тинĕс хĕрринче», «Атте-анне сăнарĕ» тата ыттисем те. Сцена çине тухса юрлама та ÿркенсе тăмарĕ Нина Владимировна. Репертуара çавăн пекех «Каçал ен» хаçат редакцийĕнче ĕçленĕ Алексей Зайцевăн сăввисемпе кĕвĕленĕ юрăсене те кĕртнĕ.

Иван Владимировича юбилей ячĕпе саламласа ырлăх-сывлăх тата нумай илемлĕ кĕвĕ хайлама чун-чĕре çĕкленĕвĕ сунатпăр.