09 июня 2017 г.
Çак кунсенче "Хырай Ĕнел ялĕн хисеплĕ гражданинĕ" ята парассине пăхакан комисси черетлĕ канашлу ирттерчĕ. Ку ятпа çынсене ырă та пархатарлă, халăхшăн, Тăван çĕршывшăн тунă усăллă ĕçсемшĕн хавхалантарма тата Хырай Ĕнел ялĕн сăн-сăпатне улăштарса илемлетес, сумĕпе хисепне çỹле çĕклес тĕлĕшпе пысăк çитĕнỹсем тунăшăн чыслаççĕ. 2017 çулта Хырай Ĕнел ялĕн аталанăвне пысăк тỹпе хывакансене, халăх хушшинче ырă ят çĕнсе илнĕ, чапа тухнă тата пурте хисеплекен çынсене комисси пĕр сасăллă пулса йышăннă. Вĕсен шутĕнче А.А. Самаркин - Комсомольски район администрацийĕн пуçлăхĕ; Н.А. Белков - чылай çул водительте тăрăшнă, халĕ "Искра" колхоз утарçи; Т.А. Макарова - "Искра" колхозра ферма заведующийĕнче нумай çул ĕçленĕ, халĕ хисеплĕ канура. "Хырай Ĕнел ялĕн хисеплĕ гражданинĕ" ята парса чыслама, хăюпа медальне тата çирĕплетекен хутне ялта ФАП уçнă чухне парнелеме палăртнă.
Л.МАКАРОВА,
Хырай Ĕнел ялĕнчи ваттисен канашĕн председателĕ
Источник: "Каçал Ен"