30 мая 2017 г.
Çурхи кунсем кăçал ăшă та илĕртỹллĕ пулмарĕç. Апла пулин те районти ял хуçалăх ĕçченĕсене çакăн евĕр çанталăк пачах та хăратмарĕ. Вĕсем палăртнă ĕçсене вăхăтра пурнăçлаççĕ. Нумай çул ỹсекен курăксене апатлантарнă, çĕрсене сỹрелесе, вăрлăха имçамласа, çурхи культурăсене акса пĕтернĕ.
Г.Хайртдинов фермер хуçалăхĕнче тăрăшакансем те çурхи ака ĕçĕсене вăхăтра пурнăçлас тесе тимлеççĕ. Хуçалăх пĕрчĕллĕ, пăрçа йышши культурăсем çитĕнтерет, выльăх-чĕрлĕх ĕрчетес енĕпе ĕçлет. Акмалли çĕр пирки калас пулсан, фермер хуçалăхĕн вăл 800 гектар. Вĕсем пĕрчĕллĕ тата пăрçа йышши культурăсене акса пĕтернĕ, куккурус вара 50 гектар çинче çитĕнĕ.
Паянхи кун хуçалăх ĕçченĕсем çĕрулми уйĕнче "тар тă-каççĕ". "Иккĕмĕш çăкăра" 60 гектар çинче çитĕнтерме палăртнă.
- Хальлĕхе 51 гектар лартнă. Кăçал "Ароза", "Ред Скарлетт" тата "Гала" сортсене лартма суйласа илнĕ. Вĕсем пирĕн тăрăхра аван çитĕнеççĕ, пысăк тухăçпа савăнтараççĕ, - терĕ фермер хуçалăхĕн агрономĕ Рашид Бадрутдинов.
Çĕрулми уйĕнче Геннадий Абукин, Юрий Кокшин тата Александр Безрукин механизаторсем тăрăшаççĕ, сажалка çинче - Сергей Ларионов, Леонид Абукин тата Евгений Кокшин ĕçченсем. Вăрлăха Сергей Журавлев водитель кỹрсе килет. Паян ĕçченсен пĕр тĕллев - ĕçе вăхăтра пурнăçласси.
А.ИСАЕВА
Источник: "Каçал Ен"