05 мая 2017 г.
- Çурхи кун çулталăк тăрантарать, - теççĕ халăхра. Çак каларăша "Слава" ЯХПК ĕçченĕсем асран кăлармаççĕ. Паянхи кун хуçалăх хирĕсенче хĕрсех çураки ĕçĕсем пыраççĕ.
Денис Владимиров, Валерий Петрушкин тата Владимир Ксенофонтов механизаторсем кĕрхи çĕртме туса хăварнă лаптăксене сỹрелеççĕ. Унсăр пуçне хуçалăх ĕçченĕсем кĕрхи культурăсене те апатлантарнă.
- Хуçалăх пĕрчĕллĕ культурăсем çитĕнтерес тата выльăх-чĕрлĕх ĕрчетес енĕпе ĕçлет. Çавна май эпир ытларах тĕштырă çине тимлĕх уйăратпăр. Тĕслĕхрен, кăçал вĕсене пурĕ 426 гектар çитĕнтерме палăртнă. Унсăр пуçне кукурузăпа пĕр çул ỹсекен курăксене 205 гектар çинче акасшăн. Хутăш культурăсем пирки калас пулсан, вĕсем валли эпир 85 гектар уйăрса хăвартăмăр, - паллаштарчĕ хуçалăх ĕç-хĕлĕпе кунти агроном Ильфат Диканеев.
Хальхи вăхăтра ĕçченсем çурхи тулăпа урпа хирĕнче тар тăкаççĕ. Сеялка çинче Александр Матвеев, Андрей Ефимов тата Александр Кузьмин тăрăшаççĕ.
А.ДЕНИСОВА
Источник: "Каçал Ен"