14 ноября 2015 г.
Кĕркуннехи каникул кунĕсен шучĕ сахалтарах. Ача-пăчан урамра та выляс килет, кил таврашĕнче те пулăшмалла... Александровкăри пĕтĕмĕшле пĕлỹ паракан шкулта вĕренекенсем вулавăша çỹреме те кăмăллаççĕ. Ара, ачасем кĕнеке ăс-хакăл пуянлăхĕ, кĕнекепе туслă пулсан ăс нумай пухатăн каларăша асрах тытаççĕ.
Вĕренекенсен хăй тĕллĕн вулас туртăмне аталантарас шутпа, вулавăшра тĕрлĕрен мероприятисем ирттереççĕ. Хальхинче вара литература пĕлĕвне тĕрĕслессипе "Поле чудес" вăйă иртрĕ, ăна Анастасия Миговорова ертсе пычĕ. Пĕринчен тепри маттур та пултаруллă, илемлĕ литературăпа кăсăкланнине аван кăтартса пачĕç. Чи пултаруллисем вара 9-мĕш класра вĕренекен Александра Юдина, 8-мĕш класра вĕренекен Дмитрий Зайцев тата 3-мĕш класри Анна Невская пулчĕç.
Вăййа хутшăнакансене кашнинех пĕчĕк парне пачĕç.
В.ПОТАПОВА
Источник: "Каçал Ен"