26 августа 2015 г.
"Искра" колхозра пур ĕçе те яланах вăхăтра пурнăçлама хăнăхнă. Паянхи куна вĕсем 270 гектар тĕш-тырра çапса тĕшĕленĕ, кĕлетсене 653 тонна кĕртнĕ. Кашни гектарăн вăтам тухăçĕ - 23,4 центнер. Выльăх-чĕрлĕхе хĕл каçма çителĕклĕ апат хатĕрлесси те - тĕп тĕллевсенчен пĕри. Вĕсем 420 тонна утă типĕтсе кĕртнĕ. Çитес вăхăтра силос хывма тытăнаççĕ. Кăçал Хырай Ĕнелĕнче куккурус нихçанхинчен те ăнса çитĕннĕ. Унăн çỹллĕшĕ 2 метр яхăн.
- 2010 çултанпа пирĕн тăрăхра куккурус лайăх çитĕннине ас тумастăп. Шăтаслăхĕ те, ỹсесси те япăхчĕ. Кăçал вара "Росс-199" сорт тухăçпа чăннипех савăнтарать, - тет куккурус уйĕпе савăнса Татьяна Мартынова тĕп агроном.
Район администрацийĕн ял хуçалăх пайĕн тĕп агрономĕ Шамиль Зейнутдинов кăçал районта куккурус япăх мар çитĕннине палăртса хăварчĕ. Вăл пĕлтернĕ тăрăх, асăннă культурăна районĕпе 759 гектар çинче çитĕнтереççĕ, пĕтĕмпех силоса хываççĕ.
Источник: "Каçал Ен"