28 января 2015 г.
Январĕн 27-мĕшĕнче района ĕçлĕ çулçỹревпе Чăваш Республикин ял хуçалăх министрĕ Сергей Павлов килчĕ. Чи малтанах вăл район администрацийĕн пуçлăхĕпе М.Афанасьевпа, ял хуçалăх тата экологи пайĕн начальникĕпе И.Миннетуллинпа "Слава", "Асаново" кооперативсене, Прокопьев, Хайртдинов фермерсен хуçалăхĕсене çитсе курчĕ, унти ĕç-хĕлпе паллашрĕ.
Ун хыççăн районти ял хуçалăх предприятийĕсемпе кооперативĕсен ертỹçисемпе ларусен залĕнче тĕл пулу иртрĕ. Унта Сергей Павлов кун йĕркинчи ыйтусене çĕклерĕ. "Республикăра ỹсĕм япăх мар, çакна цифрăсем çирĕплетеççĕ. Çакă чи малтанах çут çанталăк условийĕсенчен те, çĕре мĕнле апатлантарнинчен те, вăхăтра çум курăкран тасатнинчен те нумай килет. Сăмахран, пĕлтĕр çулла çумăр пулманран уй-хир культурисем аван çитĕннĕ теме çук. Çапах та ял хуçалăх бюджетне 37 миллиард тенкĕ кĕме пултарчĕ. Манăн ял хуçалăх кооперативĕсемпе предприятийĕсен пуçлăхĕсене çакна калас килет: чăх-чĕп ĕрчетесси вăй илсе пынăран, пĕрчĕллĕ тата пăрçа йышши культурăсене акма çĕр лаптăкĕсене ỹстерме хăрамалла мар. Çĕр улмине хĕл каçарса çуркунне сутни аван. Çавна шута илсе республикăри хăш-пĕр ял хуçалăх предприятийĕсенче хранилищĕсем турĕç. Патшалăх пулăшăвĕпе хранилище (20 процент таран укçа-тенкĕ уйăраççĕ), сĕт-çу фермисем (20 процент уйăраççĕ), пахча-çимĕç çитĕнтермелли теплицăсем туса лартма пулать", - пĕлтерчĕ министр.
Ĕçлĕ тĕл пулура районти ял хуçалăх предприятийĕсемпе кооперативсен ертỹçисем хăйсене кăсăклантаракан ыйтусене пачĕç, вĕсене Сергей Владимировичпа, Илдус Хадзятовичпа, Михаил Романовичпа пĕрле сỹтсе яврĕç.
А.КОЗЛОВА.
Источник: "Каçал Ен"