13 декабря 2014 г.
Иртнĕ кунсенче Раççейре паллă мар салтак тата çĕршыв Геройĕсен кунне халалланă мероприятисем иртрĕç. Хырай Ĕнел вăтам шкулĕн кĕçĕн класĕсенче вĕренекенсемпе совет салтакĕсем Аслă Отечественнăй вăрçăра Тăван çĕршывăмăра хăюллăн хỹтĕлени çинчен калаçу йĕркелерĕмĕр. Истори учителĕ О.Г.Сорокина ентешĕн, Кивĕ Сĕнтĕрте çуралнă Иван Смирнов пулеметчикăн тăшмансемпе çапăçнă чухнехи паттăрлăхĕ çинче чарăнса тăчĕ, ачасене ун çинчен презентаци кăтартрĕ.
5-мĕш класра "Хамăрăн геройсене пĕлетĕн-и?" викторина пулчĕ. Вĕренекенсем пĕлĕвĕпе тĕлĕнтерчĕç, савăнтарчĕç. Уйрăмах И.Шаринкин, И.Зайцева, А.Потапова тата А.Костяков палăрчĕç.
Пĕтĕм шкулĕпех "Çĕршыв геройĕсем" презентацине кăсăкланса пăхрăмăр. Презентаци вăрçă паттăрĕсемпе пĕрлех космонавтсем çинчен те паллаштарчĕ. Мероприятисем вĕренекенсемшĕн те, учительсемшĕн те усăллă пулчĕç. Хальхи вăхăтра аслă классем совет çарĕсене Афганистана кĕртнĕренпе 35 çул çитнĕ тĕле материалсем хатĕрлеççĕ.
Источник: "Каçал Ен"