29 января 2020 г.
Çак кунсенче Пучинкери «Пучах» ача садĕнче Канаш хулинчи ВДПОра ĕçлекен инструктор Вера Ильинична Лаврова хăнара пулчĕ.
Вăл ачасене пушар кÿрекен хăрушлăх çинчен каласа кăтартрĕ, инкекре сыхланмалли хăрушсăрлăх йĕркисемпе паллаштарчĕ. Вут-кăвар алхасса кайсан, унăн çулăмĕпе тĕтĕмĕ çын сывлăхĕпе пурнăçне хăрушлăх умне кăларса тăратать. Çавăнпа «хĕрлĕ автан» сиксе тухасран пурин те асăрханмалла, хăрушсăрлăх правилисене çирĕп пăхăнмалла.
Тĕлпулу вăхăтĕнчех ачасем Вера Ильиничнăпа енчен те ума хăрушлăх тухса тăрсан чи малтанах мĕн тумалли çинчен те калаçрĕç. Кĕçĕннисем кун пирки хăйсем мĕн пĕлнине уçса пачĕç, ыйтусене чи малтан хуравлама тăрăшрĕç.
Тĕлпулу вĕçленнĕ хыççăн шăпăрлансемпе воспитательсем пĕтĕмлетÿ турĕç – пушар хăрушсăрлăхĕн йĕркисене пурине те пĕр пăркаланмасăр пурнăçламалла. Шăрпăкпа, кăварпа вылямалла мар!
Источник: За победу