27 февраля 2019 г.
Нарăсăн 23-24 мĕш кунĕсенче Канаш хулинче хĕллехи полиатлон енĕпе республикăра мала тухассишĕн пынă ăмăртусене пирĕн райони шкул ачисемпе тĕрлĕ çулсенчи çăмăл алтетсем хутшăннă.
12-13 çулсенчи вĕренекенсен хушшинче Никита Ефремов çĕнтерÿçĕ пулса тăнă, вăл спортăн пĕрремĕш разряд виçине тултарнă. Унăн тантăшĕсем Артем Григорьевпа Кирилл Герлов тата Никита Димитриев та лайăх кăтартусемпе палăрнă.
14-15 çулсенчи хĕрачасенчен пирĕн командăри Валерия Федоровăпа Екатерина Владимирова ăнăçлăрах тупăшнă.
16-17 çулсенчи юниоркăсен хушшинче Елизавета Афанасьевапа Анастасия Кротова пĕрремĕшпе иккĕмĕш вырăнсене тухнă.
Вероника Ефремовăпа Александр Пашков - пирĕн районти паллă полиатлонçăсем. Вĕсем Канашра та пысăк çитĕнÿсем тунă, 21-23 çулсенчи йĕлтĕрçĕсен хушшинче çĕнтернĕ. Александр Пашков Йĕпреçсен командине чи ытларах очко «парнеленĕ». Унăн кăтартăвĕ Раççей спорт мастерĕн виçине тивĕçтерет. Сăмах майăн, вăл нумай пулмасть кăа çĕршыври ялхуçалăх вузĕсенче вĕренекенсен Новосибирск хулинче иртнĕ спартакиадинчен таврăннă, унта, тĕнче чемпионне çеç выляса ярса, иккĕмĕш вырăн йышăннă.
18-20 çулсенче спортсменсен хушшинче те мала тухнисем пур. Николай Чернов - иккĕмĕш, Эдуард Пашков- виççĕмĕш вырăнсенче.
Раççей спорт мастерĕн кандидачĕ Александр Ефремов ку хутĕнче финиша виçсĕмĕш çитнĕ. Халĕ вăл «Патвар» спорткомплексра тренерта тăрăшать, çамрăксене çĕнĕăмăртусене хатĕрлет.
Ветерансенчен Анатолий Мусьтаков мала тухнă.
Пĕтĕмĕшле кăтартусем тăрăх Йĕпреçсен пĕрлештернĕ команди, 1367 очко пухса, чемпионатра иккĕмĕш вырăн йышăннă. Спорт комплексĕсен тупăшăвĕнче пирĕн команда иккĕмĕш, пĕтĕмĕшле пĕлу паракан шкулсен хушшинче Кĕлĕмкасси вăтам шкулĕ виççĕмĕш пулнă.
Источник: За победу