18 февраля 2019 г.
Тутар Республикинчи Анат Кама хулинче 2006 – 2007 тата 2008 – 2009 çулсенче çуралнă çамрăксен ирĕклĕ майпа кĕрешсе «М7» ООО парнисене çĕнсе илессишĕн Пĕтĕм Раççейри турнирĕ иртнĕ. Унта пирĕн район чысне Федор Максимов тренер – преподаватель патĕнче хăйсен ăсталăхне туптакан Виталий Иванов (виçе категорийĕ – 29 кг, Çĕнĕ Выçли), Никита Павлов (34 кг, Хурамал) тата Дмитрий Федоров (40кг, Эйпеç) юниорсем хÿтĕленĕ.
Дмитрий Федоров хăйĕнпе тупăшнă 33 спортсмен хушшинче иккĕмĕш вырăн йышăннă, çав степень дипломне тата кĕмĕл медале тивĕçнĕ.
Вăл тата Федор Максимовăн ытти воспитанникĕсем пирĕн паллă ентеше, педагогика ăслăлăхĕсен докторне Орест Маркиянова асăнса ирттерекен уçă турнира та хутшăнаççĕ. Сăмах майăн, пурăннă пулсан, çак кунсенче Орест Маркиянов сакăрвуннă тултармаллаччĕ.
Источник: За победу