21 октября 2022 г.
Равиль Бикчурин Шăнкăртам ялĕнче 1937 çулта çуралнă. Çамрăкранах спорт еннелле туртăннă. Унăн тăванĕ Рассых Бикчурин вăл вăхăтра çулленех районта иртекен Акатуй-Сабантуйра яланах малта пулнă кăна мар, Пăлаçипе Юхма Ен тăрăхĕнче, республикăри, РСФСРти ăмăртусенче те çĕнтерỹçĕсен йышĕнче тăнă. Çамрăк Равиль те ăна курса çăмăл атлетика енĕпе интересленме, тĕрлĕ ăмăртăва хутшăнма пуçланă. Ман куç умне кашнийĕнчех вĕсем Рассыхпа районти Акатуй-Сабантуйра ăмăртнисем тухса тăраççĕ. Ялан тенĕ пекех Рассых выляса илетчĕ, Аслă Арапуç ярмăрккинче вара чылай чухне Равиль малта пулатчĕ. Эпир, Нăрваш Шăхаль çамрăкĕсем, вĕсем чупнине курма Патăрьелне, Кĕçĕн Арапуçне çуран çитеттĕмĕр. Пирĕн ялта та спортпа туслисем чылайччĕ. Виталий, Иван Макаровсем, Петр Федотов, Николай Ларкин, Иван Кошкин тата ыттисем те район шайĕнчи тĕрлĕ ăмăртура палăратчĕç. Паллах, эпир те вĕсемпе пĕрле чупаттăмăр, выляттăмăр. Эпĕ вара физкультурăпа, спортпа тарăнрах пĕлỹ илес тесе Канашри педагогика училищине вĕренме кайрăм. 1968-1970 çулсенче унта пĕлỹ пухнă вăхăтра спорт кумирĕпе Равиль Мингалиевичпа паллашма тỹр килчĕ. Халĕ те куç умĕнче вăл çăмăл атлетикăпа тĕрлĕ дистанцие чупнă, сикнĕ, снарядсене ывăтнă, тĕртнĕ чухне лайăх кăтартусем пулччăр тесен вĕсен техникине тĕрĕс, пĕлсе пурнăçламаллине каласа, кăтартса пани. Хăй вăхăтĕнче вăл 800, 1600, 3000, 5000 метрлă дистанцисенче ăмăртса чылай çитĕнỹ тунă. Хусанти педагогика институтĕнче физкультура уйрăмĕнче вĕреннĕ вăхăтра вăл çак дистанцисенче Тутарстан Республикин чемпионĕ те пулнă. Раççейĕн тĕрлĕ хулинче ăмăртса малти вырăнсене йышăннă. Педучилищĕре ĕçленĕ чухне вăл çăмăл атлетика секцийĕсĕр пуçне волейболăнне те ертсе пыратчĕ. Уйрăмах хĕрачасен команди пысăк çитĕнỹсем тăватчĕ. Вăл ĕçленĕ вăхăтра 18 çамрăк республика чемпионĕ пулнăччĕ. Çитĕнỹсемшĕн ăна 1997 çулта Чăваш Республикин физкультурăпа спортăн тава тивĕçлĕ ĕçченĕ ята панă тата РСФСР халăха вĕрентес ĕç отличникĕ паллăпа та хавхалантарнă.
Çак кунсенче район администрацийĕ пултаруллă ентеше Равиль Бикчурина "Патăрьел районне туса хунăранпа 95 çул" юбилей медалĕпе чысланă.
В. БОРОДКИН, Чăваш Республикин тава тивĕçлĕ учителĕ, РСФСР халăха вĕрентес ĕç отличникĕ
Источник: "Авангард" (газета Батыревского района)