30 января 2018 г.
Шăнкăртам ял тăрăх пуçлăхĕн парнисене çĕнсе илессишĕн волейбол турнирĕ йĕркелерĕç. Вăййа сумлă лару-тăрура уçнă çĕре район администрацийĕн пуçлăхĕн çумĕ - строительство, обществăлла инфраструктура аталану пайĕн начальникĕ Р. Яма- летдинов, ачасемпе çамрăксен спорт шкулĕн, "Паттăр" ФСК директорĕн тивĕçĕсене вăхăтлăха пурнăçлакан П. Порядков, ял тăрăхĕн пуçлăхĕ М. Валитов тата ыттисем хутшăнчĕç. М. Валитов волейбол вăййине аталантарас ĕçе тивĕçлĕ тỹпе хывнисене тав çырăвĕсемпе парнесем пачĕ.
Турнира 8 команда хутшăнчĕ. Финалти ăмăртусем Э. Феизов ячĕллĕ вăтам шкул спорт залĕнче иртрĕç. Виççĕмĕш вырăншăн "Шыгырдан-1" тата "Шигали" командăсем ăмăртрĕç. Нăрваш Шăхальсем çĕнтерчĕç. Комсомольски районĕнчи "Урмай" волейболисчĕсем Кивĕ Ахпỹртри аслă шкулсенче вĕренекен студентсемпе тĕл пулчĕç. Çамрăксем çĕнтерỹçĕ пулчĕç.
Мала тухнисем дипломсене, парнесене, Кивĕ Ахпỹртсем куçса çỹрекен кубока тивĕçрĕç.
И. Сыраев (Шăнкăртам) ăста вылякан пулнипе палăрчĕ.
Источник: "Авангард" (газета Батыревского района)